News
Լրահոս
News
Երեքշաբթի
Մարտ 19
Տեսնել լրահոսը

Հոկտեմբերի 18-ին Կազանում (Թաթարստանի Հանրապետություն) «Կազան Էքսպո» Միջազգային ցուցահանդեսային կենտրոնում մեկնարկել է World Urban Parks-2019 համաշխարհային կոնգրեսը: Կոնգրեսը կազմակերպել են World Urban Parks միջազգային ասոցիացիան, Թաթարստանի Հանրապետության կառավարությունը՝ Ռուսաստանի շինարարության նախարարության աջակցությամբ, փոխանցում է NEWS.am-ի թղթակիցը:

2019 թվականի կոնգրեսի թեման է՝ «Այգիներ եւ քաղաքներ. զարգացում բնապահպանական կայունության եւ քաղաքացիների առողջության շահերի շրջանակում»: Այս տարի World Urban Parks Congress-ի հագեցած գործնական ծրագիրը ներառում է 120 խոսնակների ելույթներ, ավելի քան 30 նստաշրջաններ եւ լիագումար նիստեր: Սպասվում են հազարից ավելի ռուսաստանցի եւ արտասահմանյան հյուրեր: Կոնգրեսի ծրագրային վարչությունը ներկայացնում են Citymakers բյուրոն, քաղաքային զարգացման ոլորտի փորձագետներ եւ Մոսկվայում «Զարյադիե» այգու հայեցակարգի ու սոցմշակութային ծրագրի համահեղինակներ: Հոկտեմբերի 18-20-ը Կազանում կոնգրեսը կքննարկի բոլոր փուլերում՝ հայեցակարգից մինչեւ շահագործում այգիների եւ հանրային տարածքների ստեղծման ռուսական եւ միջազգային լավագույն մոտեցումներն ու պրակտիկան, կբարձրացնի խնդրահարույց գոտիների հարցը եւ կդառնա Ռուսաստանում այգիների ստեղծման եւ կառավարման գործնական ուղեցույցը: Կոնգրեսը հարթակ կդառնա օրակարգի քննարկման համար լանդշաֆտային ճարտարապետության, քաղաքային միջավայրի զարգացման եւ հանրային տարածքների կառավարման ոլորտում առաջատար փորձագետների, պետական իշխանության, ինչպես նաեւ քաղաքների զարգացմանը նպաստող խոշոր եւ փոքր բիզնեսի ներկայացուցիչների միջեւ:

Գործնական ծրագիրն ուղղված է խոշոր եւ փոքր քաղաքների ու տարածքների զարգացման ինչպես գլոբալ օրակարգի, այնպես էլ նշանակալի տեղական իրավիճակների հարցերի քննարկմանը, որոնք քաղաքային միջավայրի վերափոխման նոր թրենդներ են ձեւավորում:

Կոնգրեսի առաջին օրը նվիրված է քաղաքային կառավարման մոդելներին եւ քաղաքի զարգացման վրա այգիների ու հանրային տարածքների կառուցվածքի ազդեցությանը, երկրորդ օրը նվիրվելու է կոնկրետ իրավիճակների շրջանակում քաղաքային զարգացման քաղաքականության իրականացման կիրառական գործիքակազմի եւ մեթոդների քննարկմանը:

Կոնգրեսի շրջանակում կանցկացվի 2 կրթական թեմա՝ նվիրված փոքր քաղաքներում հարմարավետ քաղաքային միջավայրի ստեղծման լավագույն նախագծերի Համառուսական մրցանակաբաշխության գնահատման չափանիշների եւ «Հարմարավետ քաղաքային միջավայրի ձեւավորում» դաշնային գերակա նախագծի շրջանակում լավագույն պրակտիկաների ներգրավման քննարկմանը:

Հոկտեմբերի 19-ին կոնգրեսի երկրորդ օրվա կրթական թեման ներառելու է նաեւ նստաշրջաններ ներգրավման հարցերի վերաբերյալ, որոնց ժամանակ Ռուսաստանի տարբեր տարածաշրջաններից փորձագետները կներկայացնեն իրենց իրավիճակները եւ կքննարկեն քաղաքային միջավայրի նախագծերի ձեւավորմանը քաղաքացիների մասնակցությունը զարգացնելու եւ գործընթացների տարբեր մասնակիցների միջեւ երկխոսություն հաստատելու հնարավորությունները:

WUP-2019-ին իրենց մասնակցությունը հաստատել են առաջին մեծության համաշխարհային աստղեր, որոնց թվում են՝ դոկտոր Կիատ Վ. Տանը՝ սինգապուրյան Gardens by the Bay-ի ստեղծող եւ նախկին գլխավոր տնօրեն, Կեն Սմիթը՝ նյույորքյան Ken Smith Workshop բյուրոյի հիմնադիր, Նյու Յորքում Ստորին Մանհեթենում Իսթ Ռիվեր Էսփլանդ (East River Waterfront Esplanade) նախագծի հեղինակներից մեկը, Տանյա Մյուլլերը՝ World Urban Parks-ի հիմնադիր տնօրեն, Մեխիկո սիթիի շրջակա միջավայրի  նախկին նախարար (2012-2018), Գիլ Պենյալոսան՝ մշտական դեսպան, WUP-ի հատուկ ներկայացուցիչ, 8 80 Сities-ի հիմնադիր, Անրի Բավան՝ ֆրանսիացի լանդշաֆտային ճարտարապետ, Գերմանիայի, Բելգիայի եւ Նիդեռլանդների քաղաքապետարանների «Կանաչ մետրոպոլիս» լանդշաֆտների զարգացման եւ արդյունաբերական ժառանգության ռազմավարության հեղինակ, Շահթ Ցոլֆերայն մաստեր ծրագրի լանդշաֆտային լուծման հեղինակ (OMA բյուրոյի հետ համատեղ), Agence Ter բյուրոյի ստեղծող, Մերի Բոումանը՝ Gustafson Porter + Bowman-ի գործընկեր: 

World Urban Parks Congress-ի մասնակիցների աշխարհագրությունը ձգվում է Ավստրալիայից ու Նոր Զելանդիայից մինչեւ ԱՄՆ, Աֆրիկա, եվրոպական եւ ԱՊՀ երկրներ։ Թաթարստանում այգիների՝ աշխարհում գլխավոր համաժողովի անցկացումը կնշանավորի Ռուսաստանի առաջնորդությունը հանրային տարածքների ստեղծման եւ համալիր զարգացման միջազգային օրակարգում։ Կազանը միանգամայն արժանիորեն է դարձել նման նշանակալի միջոցառման անցկացման վայր։ Հանրային տարածքների զարգացման ծրագիրը, որն իրականացվում է Թաթարստանում, լայնորեն ընդունվել է հանրապետության բնակիչների եւ փորձագիտական հանրույթի կողմից։ 2019 թվականին այն արժանացել է Աղա Խանի միջազգային ճարտարապետական մրցանակին, որը Ռուսաստանին՝ ներկայացվող նախագծի պարագայում, առաջին անգամ է շնորհվում 1977-ին մրցանակի սահմանման պահից սկսած։

Նշենք, որ World Urban Parks-ը քաղաքային այգիների եւ հանրային տարածքների զարգացման միջազգային կազմակերպություն է՝ ստեղծված 2015 թվականին, Այգիների եւ հանրային տարածքների միջազգային ֆեդերացիայի (Ifpra) եւ Քաղաքային այգիների ու կանաչ տարածությունների դաշինքի (Parks for Life) միաձուլման արդյունքում։ World Urban Parks-ի կազմում են ողջ աշխարհի այգիների եւ հանրային տարածքների կազմակերպությունների, ինչպես նաեւ քաղաքային վարչությունների, քաղաքային տարածքների զարգացման խորհրդատվական գործակալությունների, լանդշաֆթային կազմակերպությունների եւ համալսարանների ներկայացուցիչներ՝ Ավստրալիայից ու Նոր Զելանդիայից մինչեւ ԱՄՆ եւ Ռուսաստան (Մոսկվա եւ Կազան)։

WUP առաքելությունը կազմակերպության մասնակիցների փորձի կուտակումն է քաղաքային պայմաններում կենսապայմանների բարելավմանն ուղղված նախաձեռնությունների զարգացման նպատակով՝ ողջ աշխարհում ուրբանացման արագացմամբ պայմանավորված։ Կազմակերպությունը զբաղվում է քաղաքային այգիների աջակցությամբ եւ զարգացմամբ, շրջակա միջավայրի պահպանության ապահովմամբ, տարբեր երկրների՝ այգիների գծով մասնագետների ուսուցանմամբ եւ հավատարմագրմամբ, համաժողովների, գիտաժողովների եւ աշխատաժողովների կազմակերպմամբ՝ ազգային, տարածաշրջանային եւ տեղի կառույցների հետ համագործակցությամբ։

WUP միջազգային համաժողովի առաքելությունն է այգիների եւ հանրային տարածքների ստեղծման լավագույն միջազգային մոտեցումների եւ գործելակերպերի ուսումնասիրությունը, ինչպես նաեւ ժամանակակից այգիների հիմնման գործնական ուղեցույցների մշակումը։

Հիշեցնենք, որ առաջին անգամ World Urban Parks համաժողովը տեղի է ունեցել 2015 թվականին Պորտուգալիայում, Պոնտի դի Լիմայում։ Տարեցտարի միջոցառումն ավելի շատ մասնակիցներ է ներգրավում։ 2018-ին համաժողովը տեղի է ունեցել Մելբուռնում (Ավստրալիա), որտեղ հավաքվել էր ավելի քան 700 պատվիրակ, որոնք ներկայացնում էին ավելի քան 50 երկրների այգիներն ու հանրային տարածքները։

!
Այս նյութը հասանելի է նաև   Русский
Տպել
Ամենաշատ