Ոչ սակագնային միջոցառումներն այսօր գտնվում են գլոբալ առեւտրի բանակցությունների կենտրոնում՝ ազդելով համաշխարհային առեւտրի գրեթե 90%-ի եւ մեր առօրյա կյանքի բոլոր ոլորտների վրա:
ՄԱԿ-ի առեւտրի եւ զարգացման կազմակերպության կողմից (UNCTAD) Ժնեւում կազմակերպված ոչ սակագնային միջոցառումների՝ որպես շուկա մուտքի եւ կայուն զարգացումը խթանելու գործիքի, դասակարգման ու կարգավիճակի վերաբերյալ քննարկումներին մասնակցել է նաեւ ՀՀ ԿԵ սննդամթերքի անվտանգության տեսչական մարմնի ղեկավարի խորհրդական Էլվիրա Միրզոյանը:
Խորհրդաժողովում քննարկվել են սակագներից դուրս առեւտրային հարաբերությունների, ոչ սակագնային միջոցառումների եւ Ասիա-խաղաղօվկիանոսյան տարածաշրջանի կայուն զարգացման նպատակների փոխկապակցման, առեւտրային կանոնակարգերի թափանցիկության խնդիրները, ինչպես նաեւ ոչ սակագնային միջոցառումների կանոնները, որոնց պահպանումը պահանջում է զգալի ռեսուրսներ եւ կարգավորող համագործակցություն բազմակողմ մակարդակում:
Էլվիրա Միրզոյանը ներկայացրել է Հայաստանում ոչ սակագնային միջոցառումների մասին տվյալների հավաքագրման, դասակարգման աշխատանքները եւ դրանց արդյունքները, որոնք շատ բարձր են գնահատվել խորհրդաժողովի մասնակիցների կողմից: Նա նշել է, որ սննդամթերքի անվտանգության պաշտպանությունը եւ միջազգային ստանդարտների վրա հիմնված ոչ սակագնային միջոցառումների մշակումն ու կիրառումը Հայաստանի առաջնահերթություններից է:
Որպես այս խորհրդաժողովի շարունակություն, Է. Միրզոյանը Բրյուսելում մասնակցել է նաեւ Հայաստանի Հանրապետության եւ Եվրամիության Առեւտրի հարցերով գործընկերության կոմիտեի երկրորդ նիստին, որի ընթացքում քննարկվել է ՀՀ-ԵՄ Համապարփակ եւ ընդլայնված գործընկերության համաձայնագրի «Առեւտուր եւ առեւտրին առնչվող հարցեր»-ի ներքո համագործակցության շրջանակներում իրականացվելիք միջոցառումները եւ համապատասխան ճանապարհային քարտեզը: Նա ներկայացրել է մեր երկրում պարտադիր սպանդանոցային մորթի անցնելու գործընթացում ՍԱՏՄ ջանքերն ու աջակցությունը, արտադրության մեջ սննդի հիգիենայի միջազգային ստանդարտների ներդրման աշխատանքները, ռիսկերի գնահատման ու ռեյթինգավորման համակարգի գործարկմանն ուղղված քայլերը: «Ներկայումս ՀՀ ԿԵ սննդամթերքի անվտանգության տեսչական մարմինը նախատեսում է շարունակել ոչ սակագնային միջոցառումների պարզեցման, թափանցիկության բարձրացման եւ մասնավոր հատվածի գիտելիքների բարելավման աշխատանքները»,- ասել է ՍԱՏՄ ղեկավարի խորհրդականը:
Եվրամիության պատվիրակության առողջության եւ սննդամթերքի անվտանգության երկկողմ միջազգային հարաբերությունների Հայաստանի պատասխանատու Ժան Բլոեմենդալը նշել է, որ նախորդ հանդիպումներից հետո ՀՀ ԿԵ ՍԱՏՄ կատարած աշխատանքը բավականին տպավորիչ է: Նա բարձր է գնահատել վերջին մեկ տարվա ընթացքում միջազգային կառույցների հետ Տեսչական մարմնի համագործակցության ակնհայտ ակտիվացումը, ինչպես նաեւ այն կարեւորությունը, որ հայկական կողմը տալիս է միջազգային ստանդարտների ներդրմանը:
