ԱՄՆ-ի նախագահ Դոնալդ Թրամփը հաստատել է Սիրիայի հյուսիս-արեւելքում ամերիկյան զորքերի հատուկ գործողությունների ժամանակ «Իսլամական պետություն» ահաբեկչական կազմակերպության առաջնորդ Աբու Ալ-Բաղդադիին ոչնչացնելու փաստը, հաղորդում է BBC-ը:
Այդ մասին ԱՄՆ-ի նախագահը հայտնել է Սպիտակ տանն իր ելույթի ժամանակ:
«Նա չի զոհվել հերոսաբար: Նա մահացել է վախկոտի նման: Լալիս էր, նվնվում, բղավում եւ բերել էր իր հետ սեփական երեխաներին»,-ասել է Թրամփը:
ԱՄՆ-ի նախագահը հավելել է, որ Ալ-Բաղդադին պայթեցրել է մահապարտի բաճկոնը՝ այդկերպ սպանելով նաեւ իր երեք երեխաներին:
Նշենք, որ մի շարք ԶԼՄ-ներ՝ հղում կատարելով անանուն աղբյուրներին, հայտնել էին ամերիկյան զորքերի հատուկ գործողությունների հետեւանքով ԻՊ-ի առաջնորդի հնարավոր ոչնչացման մասին:
Ավելի վաղ ԱՄՆ-ը հայտարարել էր «Իսլամական պետությունն» ամբողջովին ոչնչացնելու մասին:
ՌԻԱ Նովոստի-ի հաղորդմամբ՝ ԱՄՆ-ի նախագահը շնորհակալություն է հայտնել Ռուսաստանին, Թուրքիային, Սիրիային եւ Իրաքին Աբու Բաքրա ալ-Բաղդադիին ոչնչացնելու հարցում ցուցաբերված աջակցության համար:
«Ես ցանկանում եմ շնորհակալություն հայտնել Ռուսաստանին, Թուրքիային, Սիրիային եւ Իրաքին: Ես նաեւ ցանկանում եմ իր երախտիքը հայտնել Սիրիայի քրդերին աջակցության համար, որը նրանք կարողացել են ցուցաբերել այդ շատ բարդ առաքելության ընթացքում»,-ասել է Թրամփը:
«Ռուսաստանը կարեւոր քայլ էր արել մեզ համար՝ բացելով օդային տարածքը, մենք թռել ենք այն տարածքների երկքնում, որը Ռուսաստանը վերահսկել է»,-լրագրողներին ասել է Թրամփը:
Նա նշել է, որ ՌԴ-ը նախապես տեղեկացված չի եղել ալ-Բաղդադիի ոչնչացման ուղղությամբ ԱՄՆ-ի գործողությունների մասին, սակայն թույլ է տվել թռնել Սիրիայում վերահսկվող տարածքների երկնքում:
«Նրանք չգիտեին, թե որն է առաքելությունը, սակայն գիտեին, որ մենք թռնում ենք այն տարածքներում, որտեղ նրանք ունեին ռազմական պոտենցիալ»,-ասել է Թրամփը: