Տեղեկատվական տեխնոլոգիաների ոլորտում Հայաստանի եւ Կորեայի միջեւ համագործակցության մեծ ներուժ կա, որում Հայաստանն ունի հեռուն գնացող նպատակներ, եւ կորեական փորձը կարող է օգտակար լինել: Այս մասին հոկտեմբերի 28-ին լրագրողների հետ զրույցում ասաց Հայաստանում Հարավային Կորեայի արտակարգ եւ լիազոր դեսպան Լի Սոկ Պեն:
Դեսպանն ընդգծեց, որ Հայաստանի նախագահ Արմեն Սարգսյանի հետ վերջերս տեղի ունեցած հանդիպման ժամանակ նա հույս է հայտնել, որ առեւտրա-տնտեսական երկկողմ հարաբերությունները նոր մակարդակի կհասցվեն:
Նրա խոսքով՝ կորեացի բիզնեսմենները Հայաստանի տնտեսության մասին աղոտ պատկերացում ունեն, եւ այս բացը լրացնելու համար այս տարի նախատեսվում է Երեւան պատվիրակություն ուղարկել, որը կծանոթանա տեղական ներուժին:
Նշենք, որ Երեւանում հոկտեմբերի 28-ին ընթանում է հայ-կորեական բիզնես համաժողով:
