ԱՄՆ պետքարտուղար Մայք Պոմպեոն խոստացել է, որ ԱՄՆ-ը կշարունակի «Իսլամական պետություն» ահաբեկչական խմբավորման դեմ պայքարը՝ հուսադրելով Վաշինգտոնում հավաքված մտահոգված դաշնակիցներին, հաղորդում է AFP-ը:
«ԱՄՆ-ը կշարունակի գլխավորել կոալիցիան եւ կշարունակի անվտանգության ապահովման ջանքերը»,- ասել է նա:
Ֆրանսիայի կողմից կազմակերպված հանդիպմանը, որը ընթանում է Վաշինգտոնում, մասնակցում են 31 երկրներից ԱԳ նախարարներ եւ բարձրաստիճան պաշտոնյաներ:
Պոմպեոն վստահեցրել է, որ ամերիկյան զորքերը մնացել են այնտեղ, որպեսզի «համոզվեն, որ ԻՊ-ը երբեք երկորդ շնչառություն չի ստանա»: Նա հատուկ նշել է հոկտեմբերի 26-ին տեղի ունեցած հատուկ գործողությունը, որի ընթացքում սպանվեց ԻՊ պարագլուխ Աբու Բաքր ալ-Բաղդադին, ինչպես նաեւ շարժման այլ առաջնորդներ:
«Կոալիցիայի անդամները պետք է իրենց հայրենիքներ վերադարձնեն հազարավոր արտասահմանցի գրոհային-ահաբեկիչներին եւ պատժեն իրենց գործած չարագործությունների համար»,- ասել է Պոմպեոն:
Սակայն դաշնակիցները, մասնավորապես, Ֆրանսիան եւ Մեծ Բրիտանիան, չեն ցանկանում վերադարձնել ծայրահեղականներին, որոնք ձգտում են հայրենիքում քաոս ստեղծել: Այդ երկրները փորձում են նրանցից ոմանց զրկել քաղաքացիությունից:
