Հայաստանում քրեական ենթամշակույթի քրեականացման մասին օրինագիծը խոցելի է բոլոր իմաստներով։ Այս մասին Ազգային ժողովում նոյեմբերի 20-ին ավանդական ճեպազրույցների ժամանակ ասաց «Բարգավաճ Հայաստան» կուսակցության պատգամավոր Իվետա Տոնոյանը։
Նրա խոսքով՝ կուսակցությունում լրջորեն անհանգստացած են այս օրինագծի առնչությամբ, եւ հենց այդ պատճառով «դեմ» են քվեարկել։ Տոնոյանը նշել է, որ հանցագործները եւ օրինախախտները պետք է պատասխանատվություն կրեն իրենց արարքների համար, ընդ որում՝ կոնկրետ։
Նշենք, որ կառավարության առաջարկած քրեական ենթամշակույթի քրեականացման մասին օրինագծի քվեարկության ժամանակ, որն, ըստ էության, նախատեսում է պատասխանատվության ենթարկել «քրեական հեղինակություններին» միայն իրենց հատուկ կարգավիճակի համար հանցավոր աստիճանակարգում, «Լուսավոր Հայաստան» եւ «Բարգավաճ Հայաստան» կուսակցությունները չեն աջակցել «Իմ քայլը» դաշինքին։