Տվյալ օրինագիծը նպատակ ունի արգելել զինծառայողների միջեւ ոչ կանոնադրական հարաբերությունները: Այս մասին նոյեմբերի 29-ին ԱԺ պետաիրավական հարցերի մշտական հանձնաժողովի նիստում Քրեական օրենսգրքում փոփոխություններ կատարելու մասին օրինագծի քննարկման ընթացքում ասաց օրինագծի համամեղինակ, «Բարգավաճ Հայաստան» կուսակցության պատգամավոր Նաիրա Զոհրաբյանը:

Նրա խոսքով՝ զինծառայողին ինքնասպանության հասցնելու դեպքում մեղավորը կպատժվի ազատազրկմամբ: «Այն դեպքում, եթե իր զորամասի տարածքում կամ այլ վայրում զինծառայողը սպառնում է այլ զինծառայողի, բռնություն է ցուցաբերում, կոպիտ վերաբերմունք է ցուցաբերում կամ նվաստացնում է նրա պատիվն ու արժանապատվությունը, ինչը կարող է ուղիղ կամ անուղղակի պատճառ դառնալ զինծառայողի ինքնասպանության համար, կպատժվի 3-12 տարվա ազատազրկմամբ»,- պարզաբանեց Զոհրաբյանը:

Ընդ որում, եթե տվյալ գործողություններ են կատարվել մի խումբ անձանց, սպաների, հրամանատարի, ենթակայի կողմից մեկ այլ ենթակայի նկատմամբ, պարբերաբար միեւնույն անձի նկատմամբ, ապա ժամկետը կկազմի 5-10 տարի: Իսկ եթե տվյալ հանցանքներն իրականացվել են ռազմական դրության ժամանակ, ապա ժամկետը կմեծանա՝ 7-12 տարի: «Մեր զինված ուժերում ինքնասպանությունների վիճակագրությունը շատ ցավալի է: Ցավոք, այսօր մեր բանակում ոչ կանոնադրական հարաբերությունների պատճառով ինքնասպանությունների թիվը գերազանցում է թշնամու կրակից կորուստների թվից: Այդ հարցը լուրջ եւ անհապաղ լուծում է պահանջում»,- հայտարարեց պատգամավորը:

Նշենք, որ օրինագիծը ստացավ հանձնաժողովի դրական եզրակացությունը: