Ուկրաինայի անվտանգության ծառայության Չերկասկի մարզի աշխատակիցները կասեցրել են միջազգային հաքերական խմբավորման գործունեությունը, որի միջոցով հանցագործները հափշտակում էին Եվրոպայի եւ ԱՄՆ-ի էլեկտրոնային վճարային համակարգերի օգտատերերի միջոցները, հաղորդում է 112.ua-ն՝ հղում կատարելով Ուկրաինայի անվտանգության ծառայությանը:
«Հատուկ ծառայության աշխատակիցները պարզել էին, որ մեքենայությունների կազմակերպիչները Կիեւում բնակվող Ռուսաստանի քաղաքացի է եւ Չերկասկի մարզի երեք բնակիչ: Հաքերական հատուկ ֆորումների միջոցով կիբերհանցագործները գնում էին օտարերկրացիների վճարային հաշվեհամարների տվյալները: Յուրացված միջոցներով նրանք ձեռք էին բերում ապրանքներ հայտնի արտասահմանյան ինտերնետային խանութներից: Այնուհետեւ արտադրանքն իրացնում էին Ուկրաինայում առցանց ծառայությունների միջոցով»,-ասվում է հաղորդագրության մեջ:
Հաքերները զբաղվում էին այդ գործունեությամբ 2010 թվականից, իսկ նրանց տարեկան շրջանառությունը կազմում էր 500-700 հազար դոլար: Բնակության վայրում խուզարկության ժամանակ իրավապահները առգրավել են համակարգչային տեխնիկան եւ հայտնաբերել անօրինական ճանապարհով գնված ապրանքներ՝ սմարթ ժամացույցներ, iPad, Iphone, GoPro տեսախցիկներ, նավիգատորներ, ավտոմեքենայի տեսագրող սարքեր, էխոլոտներ եւ այլն, ինչպես նաեւ ավելի քան 5 հազար դոլար: