Apple ամերիկյան ընկերությունը երկուշաբթի օրը հրապարակել է այն հավելվածների ցուցակը, որոնք առավել հաճախ այս տարի ներբեռնել են iPhone սմարթֆոնների սեփականատերերը, հայտնում է ՏԱՍՍ-ը։
Անվճար հավելվածների վարկանիշում առաջին տեղը զբաղեցրել է YouTube-ը։ Երկրորդ տեղում Instagram-ն է, երրորդ տեղում՝ հաղորդագրությունների փոխանակման Snapchat-ը։ Առաջին հնգյակը փակում են կարճ տեսանյութերի ստեղծման եւ դիտման համար TikTok հարթակը եւ Messenger-ը։
iPhone-ի համար ամենաշատ ներբեռնված վճարովի ծրագրերի ցուցակում առաջին տեղը զբաղեցրել է Facetune ծառայությունը։ Այն նախատեսված է բջջային հեռախոսով արված լուսանկարների խմբագրման համար։ Ամենահանրահայտ անվճար խաղ է ճանաչվել Mario Kart Tour-ը։ Վճարովի խաղերի վարկանիշում առաջին տեղը զբաղեցրել է Minecraft-ը։
Apple-ը նաեւ ներկայացրել է այն հավելվածների վարկանիշը, որոնք փորձագետների կարծիքով, ամենահաջողվածն են եղել ընթացիկ տարում։ iPhone սմարթֆոնների համար դա Spectre Camera ծառայությունն է, որը նախատեսված է «երկար» լուսանկարելու համար։ iPad պլանշետների համար ամենահաջողված է ճանաչվել Moleskine հավելվածը, որը նոթատետրի եւ նկարչական ալբոմի գործառույթներ ունի։
Ինչպես գրում է ոլորտային 9to5Mac պորտալը, տարվա լավագույն հավելվածները նշվել են երկուշաբթի օրը Նյու Յորքում մշակողների հետ Apple-ի աշխատակիցների հանդիպումից հետո։ Ավելի վաղ որոշ ԶԼՄ-ներ հայտնել էին, որ ընկերությունը այդ օրը տարատեսակ ծրագրային ապահովումներին նվիրված շնորհանդես կանի։ 9to5Mac-ը արձանագրում է, որ դա չափազանցված էր։ Apple-ը նոր սարքեր կամ հավելվածներ չի ներկայացրել։
1976թ․ հիմնադրված Apple-ը, բացի iPhone-ից եւ iPad-ից, արտադրում է iMac համակարգիչներ, MacBook նոթբուքեր, iPod երաժշտական ձայնարկիչներ եւ այլ բարձր տեխնոլոգիական տեխնիկա։ Ընկերությունը, որի գլխավոր գրասենյակը ամերիկյան Կուպերտինոյում է, աշխարհում ամենախոշորներից է։ Նրա շուկայական շրջանառությունը հասնում է մոտ 1,2 տրիլիոն դոլարի։