Եվրոպացի ներդրողները, որոնք ավելի քան վեց տրլն եվրո գումաի ակտիվներ են տրամադրում, կոչ են անում Եվրամիության կառավարություններին արագացնել 2050 թվականի կլիմայական չեզոքության նպատակի ամրապնդմանն ուղղված ջանքերը, տեղեկացնում է Reuters-ը։
Նամակում 44 ընկերություններ, այդ թվում՝ Allianz-ը, Handelsbanken-ը, Aberdeen Investment-ը եւ Aegon NV-ը, նշել են, որ օրենքը ներդրողներին ավելի մեծ վստահություն կհաղորդի երկարաժամկետ որոշումներ ընդունելիս էկոլոգիապես պատասխանատու նախագծերի առումով։
Այս քայլը ի ցույց է դնում կլիմայի փոփոխության հանդեպ ներդրողների բարձր ուշադրությունը ինչպես ռիսկի, այնպես էլ հնարավորության տեսակետից։
Նշելով այդ խնդրի անտեսման «աղետալի ազդեցությունը»՝ ընկերությունները մատնանշել են, որ կլիմայի չվերահսկվող փոփոխությունը կարող է համաշխարհային տնտեսության վրա 23 տրլն դոլար նստել։
«Եվ հակառակը, կլիմայի փոփոխության ոլորտում ավելի ակտիվ գործողությունները կարող են 26 տրլն դոլար բերել մինչեւ 2030 թվականը»,- ասվում է նամակում։
ԵՄ 28 անդամ երկրների մեծ մասը ստորագրել է պարտավորություն ԵՄ շրջանակում մինչեւ 2050 թվականը դառնալ կլիմայական առումով չեզոք։ Օրենքը կստիպի բոլոր անդամ պետություններին հասնել կլիմայական չեզոքության մինչեւ 2050 թվականը։