2019-ին Հայաստանի եւ Ռուսաստանի պաշտպանության նախարարները հանդիպել են 3 անգամ, եւ դա վկայում է երկու պետությունների պաշտպանական գերատեսչությունների միջեւ համագործակցության բարձր մակարդակի մասին: Այս մասին այսօր Երեւանում Եվրասիական փորձագիտական ակումբի 6-րդ ամենամյա նիստում «2019 թվականին հայ-ռուսական հարբերությունները: Նոր հնարավորությունների պատուհան» թեմայով համաժողովի ժամանակ հայտարարեց ՀՀ ՊՆ պաշտպանական քաղաքականության վարչության պետի տեղակալ Էդուարդ Երիցյանը:
Նա նշեց, որ Հայաստանը Անդրկովկասում Ռուսաստանի ռազմավարական դաշնակիցն ու առանցքային գործընկերն է՝ այդպիսով մեջբերելով ՌԴ ՊՆ ղեկավար Սերգեյ Շոյգուի խոսքերը:
Երիցյանը հիշեցրեց, որ երկու երկրների միջեւ ռազմատեխնիկական համագործակցությունը գտնվում է բարձր մակարդակի վրա, Ռուսաստանն ու Հայաստանը հաջողությամբ համագործակցում են միջազգային կառույցների շրջանակում, առաջին հերթին ՀԱՊԿ-ում եւ ԱՊՀ-ում:
«Այս տարի ռազմական քանակակազմը համատեղ լուծել է ուսումնամարտական խնդիրները «Մարտական եղբայրություն-2019» օպերատիվ-ռազմավարական զորավարժությունների ընթացքում, որոնք անցկացվել են այս տարվա հոկտեմբերին Ռուսաստանի, Բելառուսի եւ Տաջիկստանի տարածքներում, ինչպես նաեւ սեպտեմբերին Աստրախանի «Աշուլուկ» զորավարժարանում անցկացված «Մարտական ընկերակցություն-2019» զորավարժությունների ընթացքում»,- ասաց նա:
Ընդ որում, նա նշեց, որ Հայաստանի եւ Ռուսաստանի պաշտպանության նախարարությունները մեծ ուշադրություն են հատկացրել երկու երկրների միջեւ ռազմատեխնիկական համագործակցությանը, որն այժմ զարգանում է 3 հիմնական ուղղություններով՝ ռազմատեխնիկական աջակցություն, ռազմատեխնիկական համագործակցության հարցով հայ-ռուսական միջկառավարական հանձնաժողովի շրջանակում փոխգործակցություն, որի գործունեությունը վերջին շրջանում էապես ակտիվացել է, եւ պետական արտահանման վարկի տրամադրում:
Երիցյանը նշեց, որ տվյալ դեպքում առանցքային է ոչ միայն «վարկ» տերիմը, այլ «պետական» տերմինը, քան որ ի տարբերություն կոմերցիոն վարկի՝ այն տրամադրվում է ամենացածր տոկոսադրույքով:
Բացի այդ, ՀՀ ՊՆ ներկայացուցիչը հիշեցրեց, որ բանակցությունների ընթացքում նշվել է ՌԴ ՊՆ բուհերում հայ զինվորականների պատրաստվածության կարեւորությունը:
Նշենք, որ համաժողովը կազմակերպվել է «Ինտեգրացիա եւ զարգացում» հետազոտավերլուծական հասարակական կազմակերպության եւ Եվրասիական փորձագիտական ակումբի կողմից:
