«Հեռուստատեսության եւ ռադիոյի մասին» օրենքը՝ որպես իրավական գործիք, հնացել է եւ չի համապատասխանում իրողություններին, որոնք ստեղծվել են նոր հետհեղափոխական Հայաստանում։ Այս մասին «Օրենսդրական փոփոխություններ տեսալսողական մեդիածառայությունների ոլորտում» թեմայով խորհրդարանական լսումների ժամանակ հունվարի 16-ին ասաց խորհրդարանի Գիտության, կրթության, մշակույթի եւ սփյուռքի հարցերի մշտական հանձնաժողովի նախագահ, կառավարող «Իմ քայլը» դաշինքի պատգամավոր Մխիթար Հայրապետյանը։
Լսումները, նրա խոսքով, հետապնդում են ոլորտի բոլոր խնդիրները վերհանելու եւ տարբեր մտքերի ու առաջարկությունների ազատ արտահայտումն ապահովելու նպատակ, որոնք կարող են հետագայում կյանքի կոչվել նոր օրենսդրական նախաձեռնության շրջանակում։ «Կիրականացվեն լուրջ եւ մասշտաբային փոփոխություններ։ Ոմանց համար դրանք բարդ ու ծանր կլինեն, քանի որ «Հեռուստատեսության եւ ռադիոյի մասին» օրենքը մինչհեղափոխական շրջանում, գուցե, կարող էր կիրառելի լինել շատ կողմերի համար, բայց հիմա մենք մեր առջեւ նպատակ ենք դրել լիովին բարեփոխել այս ոլորտը»,- ասաց պատգամավորը՝ ավելացնելով, որ նոր օրենսդրական նախաձեռնությունը պետք է լուծի երեք խնդիր՝ տեխնիկական հարցեր, եթերի բովանդակություն, ինչպես նաեւ մշակութային-կրթական բաղադրիչի ապահովում, ինչը, խորհրդարանականի կարծիքով, չափազանց կարեւոր է։