Գերմանիայում գագաթնաժողովին մասնակցում են Լիբիայում երկարատեւ քաղաքացիական պատերազմի առանցքային դերակատարները՝ նպատակ ունենալով զսպել արտասահմանյան ռազմական միջամտությունը, ամրապնդել հրադադարի ռեժիմն ու օգնել քաղաքական գործընթացը վերականգնելու հարցում, որը կոչված է դադարեցնելու քաոսը երկրում, գրում է Associated Press-ը:
Գերմանիայի կանցլեր Անգելա Մերկերը հանդիպել է 12 երկրների առաջնորդների, ինչպես նաեւ ՄԱԿ-ի, ԵՄ-ի, Աֆրիկյան միության եւ Արաբական պետությունների լիգայի ղեկավարների հետ:
Գագաթնաժողովի մասնակիցներից են Ռուսաստանի նախագահ Վլադիմիր Պուտինը, Թուրքիայի նախագահ Ռեջեփ Թայիփ Էրդողանը, Իտալիայի վարչապետ Ջուզեպե Կոնտեն, Մեծ Բրիտանիայի վարչապետ Բորիս Ջոնսոնը, ԱՄՆ-ի պետքարտուղար Մայք Պոմպեոն: Հանդիպմանը ժամանել են նաեւ միմյանց հակազդող Լիբիայի միջազգայնորեն ճանաչված վարչապես Ֆաիզ Սարաջն ու Լիբիայի ազգային բանակի հրամանատար գեներալ Խալիֆա Խաֆթարը:
Գերմանիան մտադիր է ջանքեր գործադրել Լիբիայում հրադադարի ուղղությամբ ՄԱԿ-ի գլխավոր քարտուղար Անտոնիու Գուտերիշի եւ Լիբիայում ՄԱԿ-ի հատուկ ներկայացուցիչ Հասան Սալամի օգնությամբ:
Այդուհանդերձ, նշում է գործակալությունը, գագաթնաժողովի արդյունքները դեռեւս հայտնի չեն: Ի սկզբանե հայտնի էին գագաթնաժողովի մասնակիցների մոտեցումների միջեւ տարբերությունները, որոնցից մեկը Էրդողանի հայտարարությունն էր, որ աշխարհին չի հաջողվել արձագանքել Խաֆթարի «անխոհեմ հարձակումներին»:
