Հայաստանի էլեկտրաէներգետիկական շուկայի ազատականացման ծրագրի իրականացման ժամանակ բազմաթիվ խնդիրներ են առաջացել: Այս մասին հունվարի 24-ին ԱԺ նիստում «էներգետիկայի մասին» օրենքում լրացումներ եւ փոփոխություններ կատարելու մասին օրինագծի քննարկման ընթացքում հայտարարեց ՀՀ տարածքային կառավարման եւ ենթակառուցվածքների նախարարի տեղակալ Հակոբ Վարդանյանը:
Նրա խոսքով՝ ծրագիրը պետք է գործարկվեր դեռեւս 1,5 տարի առաջ, սակայն մի շարք խնդիրների առկայության պատճառով ցանկալի արդյունք չգրանցվեց: Առաջին հերթին, ինչպես նշեց նախարարի տեղակալը, խոսքը շուկայի ազատականացման հետ կապված հարցերը կարգավորող ծրագրային ապահովման բացակայության մասին է: «Այժմ նախարարությունը գործընկեր դոնորների ֆինանսական եւ տեխնիկական աջակցությամբ մշակում է տվյալ ծրագիրը: Ոչ պակաս կարեւոր խնդիր է ընկերությունների պարտավորությունների եւ պատասխանատվության հստակեցումը, որոնք զբաղվում են էլեկտրաէներգիայի արտադրությամբ, առաքմամբ եւ բաշխմամբ: Այդ պարտավորություններն ու պատասխանատվությունը կներառվեն ծրագրային ապահովման մեջ»,- պարզաբանեց Վարդանյանը: Բացի այդ, նա նշեց, որ Վրաստանի էներգահամակարգի հետ զուգահեռ աշխատանքի բացակայությունը դեռ թույլ չի տալիս արտաքին առեւտուր իրականացնել: