Վերակառուցման եւ զարգացման եվրոպական բանկի կանխատեսումներով՝ տնտեսական աճը Հայաստանում 2020թ․ 5 տոկոս կկազմի։ Այս մասին այսօր ամփոփիչ մամուլի ասուլիսի ժամանակ հայտնեց Հայաստանում ՎԶԵԲ ղեկավար Դմիտրի Գվինդաձեն։
Նրա խոսքերով՝ 5 տոկոսանոց աճը բանկի կանխատեսումն է, ելնելով անցյալ տարվա նոյեմբերի դրությամբ երկրի տնտեսության գնահատականից։ Գվինդաձեն պարզաբանեց, որ տարեկան երկու անգամ ՎԶԵԲ-ը վերանայում է երկրներում տնտեսական իրավիճակների կանխատեսումները։
Նա նշեց, որ մեծ մասամբ կանխատեսումները տարվա ընթացքում որոշակի փոփոխություններ են կրում, սակայն, որպես կանոն, փոփոխություններն աննշան են լինում։
Մեկնաբանելով այն հարցը, թե ՎԶԵԲ-ն ինչպես է գնահատում ներդրումային միջավայրի բարելավման ուղղությամբ կառավարության ջանքերը, Գվինդաձեն ասաց, որ ներդումային կլիման կախված է ոչ միայն օրենսդրությունից, հարկերի եւ տուրքերի մակարդակից, այլ նաեւ աշխարհաքաղաքական իրավիճակից, որի վրա կառավարությունն ազդել չի կարող։
Այնուամենայնիվ, գնահատելով ներքին ցուցանիշները՝ Գվինդաձեն նշեց, որ Հայաստանում անցկացվում է խիստ դրամավարկային քաղաքականություն եւ բանկային համակարգի վերահսկողություն, նույնը կարելի է ասել նաեւ ֆիսկալային քաղաքականության եւ արտաքին պարտքի կառավարման մասին։ Նշված գործոնները, ՎԶԵԲ-ի ներկայացուցչի գնահատականներով, նպաստում են կայունության ապահովմանը արտաքին եւ ներքին ցնցումների ֆոնին։
Գվինդաձեի գնահատականներով՝ ինչ վերաբերում է ներդրումների հարցին, հիմնական շեշտը պետք է դնել «փոքր երկիր- գլոբալ ազգ» կոնցեպցիայի վրա։ «Անհրաժեշտ է գործարկել համաշխարհային հայության գաղափարը, ինչպես նաեւ այն զգացմունքային կապը, որ ունեն սփյուռքի հայերը իրենց պատմական հայրենիքի հետ։ Այդ զգացմունքային կապը անհրաժեշտ է վերածել ներդրման»,- հայտարարեց նա։
