Ճիշտ կառավարման եւ վարչատարածքային ճիշտ բարեփոխում իրականացնելու պարագայում խոշորացված համայնքները մի քանի անգամ ավելի արդյունավետ են, ինչից շահում է համայնքն ու նրա բնակիչը: Այս մասին այսօր՝ փետրվարի 6-ին, Կառավարության նիստում հայտարարեց ՀՀ տարածքային կառավարման եւ ենթակառուցվածքների նախարար Սուրեն Պապիկյանը:
Նա կառավարությանը ներկայացրեց համայնքների խոշորացման երկու նախագիծ, որոնցից մեկը Լոռու մարզի Լերմոնտովո եւ Անտառաշեն համայնքները միավորվում են եւ ստեղծվում է Լերմոնտովո խոշորացված համայնքը: Սրանք ազգային փոքրամասնություն ներկայացնող համայնքներ են:
Իսկ Տավուշի մարզում առաջարկվում է ստեղծել Իջեւան խոշորացված համայնքը, որում կներառվեն 19 համայնքներ:
«Նախատեսվում է ունենալ Իջեւան միավորված համայնք, բաղկացած ՀՀ Տավուշի մարզի՝ Ազատամուտ, Ակնաղբյուր, Աճարկուտ, Այգեհովիտ, Աչաջուր, Բերքաբեր, Գանձաքար, Գետահովիտ, Դիտավան, Ենոքավան, Լուսահովիտ, Լուսաձոր, Խաշթառակ, Ծաղկավան, Կիրանց, Սարիգյուղ, Սեւքար, Վազաշեն համայնքներից»,-նշեց Պապիկյանը:
Նրա խոսքով՝ Իջեւանի այս մոդելի ընտրությունը մեծապես կախված է նրանից, որ շրջանային ավելի խոշոր մոդելը փաստում է դրա առավել արդյունավետությունը՝ հաշվի առնելով նաեւ, որ 2008-2011թթ. տեղի են ունեցել մի շարք բարեփոխումներ, այդ թվում՝ հողային: «Տարբեր համայնքների մեջ առկա են հողային, սահմանային վեճեր, եւ այս պարագայում խնդիրն ամբողջությամբ լուծվում է»,-նշեց Պապիկյանը:
Նախարարն ընդգծեց նաեւ, որ խոշորացված համայնքները մի քանի անգամ ավելի սուբվենցիոն ծրագրեր են ներկայացրել ու համաֆինանսավորման ավելի մեծ մասնաբաժին են վերցրել, ինչն էլ այդպիսի համայնքների՝ ավելի արդյունավետ լինելու ցուցիչներից է:
2020թ. հունիսի 14-ին ՀՀ Լոռու մարզի Լերմոնտովո եւ ՀՀ Տավուշի մարզի Իջեւան համայնքներում առաջարկվում է անցկացնել համայնքի ղեկավարների եւ ավագանու ընտրություն: