ԵՄ-ն ուզում է ուժեղացնել իր դերը Խաղաղ օվկիանոսի անվտանգության ոլորտում։ Խաղաղօվկիանոսյան տարածաշրջանի հարցերով ԵՄ դեսպան Սուջիրո Սեամը AFP-ին հայտարարել է, թե ուզում է, որ ԵՄ-ն ամրապնդի առեւտրային կապերը եւ առավել ակտիվ քաղաքական դեր խաղա տարածաշրջանում։
Դեսպանի խոսքերով՝ նա ձգտում է փոխել ընկալումը խաղաղ օվկիանոսում, որտեղ ԵՄ-ն նախեւառաջ օգնության դոնոր է եղել։ «Մենք խոշորագույն ազատ շուկան ենք աշխարհում, մենք խաղաղօվկիանոսյան կղզի-պետություններին այդ ազատ շուկային հասանելիություն ստանալու հնարավորություն ենք տալիս՝ տնտեսական համագործակցության մի շարք համաձայնագրերի միջոցով»,- ասել է նա։ «Ես կուզեի, որ Եվրոպական միությունը առավել նկատելի քաղաքական դեր խաղար»,- նշել է դիվանագետը՝ հավելելով, որ խոսքը անվտանգության եւ պաշտպանության մասին է։
Հարցին, թե ինչ ձեւ կարող է ունենալ ԵՄ ներկայությունը, Սաեմը բացառել է «ՌԱՄՍԻ տեսակի գործողությունը», որը վերաբերում է Սողոմոնի կղզիներում Ավստրալիայի խաղաղարար առաքելությանը, որը տեւել է 2003-ից մինչեւ 2017 թվականները։ Նրա խոսքերով՝ եվրոպական ուժերը կարող են օգնել այնպիսի ոլորտներում, ինչպես կլիմայի փոփոխության հետեւանքների մեղմացումը, անօրինական ձկնորսության վերահսկողությունը եւ աղետների ժամանակ օգնության ցուցաբերումը։
Խաղաղ օվկիանոսի հանդեպ ԵՄ-ի հետաքրքրության վերականգնումը տեղի է ունենում այն բանից հետո, երբ Ավստրալիան, ԱՄՆ-ը, Մեծ Բրիտանիան, Նոր Զելանդիան եւ Ճապոնիան ակտիվացրել են դիվանագիտական ջանքերը տարածաշրջանում, որպեսզի դիմադրեն Չինաստանի աճող հեղինակությանը։ «Մենք դեմ չենք Չինաստանին։ Եթե լինեն այլ գործընկերների, այդ թվում Չինաստանի հետ աշխատելու հնարավորություններ, մենք կաշխատենք օգտագործել դրանք»,- նշել է դիվանագետը։ ԵՄ-ն կիսում է կլիմայի փոփոխության հետ կապված շտապ գործողությունների անհրաժեշտության մասին Խաղաղօվկիանոսյան տարածաշրջանի կարծիքը, ասել է նա, նվազեցնելով, սակայն, այն հավանականությունը, որ Եվրոպան կընդունի փախստականներին կղզի-պետություններից, որոնց սպառնում է ծովի մակերեւույթի բարձրացումը։