«Պրոմտեխնոլոգիա» ընկերությունը (ORSIS ապրանքանիշով հրացանների արտադրողը) դատական կարգով կվիճարկի Հայաստանի հանրային հեռուստաընկերության եթերից արված հայտարարությունը՝ երկրի ՊՆ-ին բարձրացված գներով ռազմականի փոխարեն որսորդական նշանոցների վաճառքի մասին հայտարարությունը, հայտնել է ընկերությունը ՏԱՍՍ-ին:
Հայաստանի Հանրային հեռուստատեսության սյուժեում, որը հեռարձակվել է փետրվարի 10-ին, հաղորդվում էր, որ հանրապետության Հատուկ քննչական ծառայությունը հետաքննում է մի դեպք, ըստ որի ռազմական նշանոցների փոխարեն ՀՀ Պաշտպանության նախարարությանը որսորդական նշանոցներ են վաճառել: Չորեքշաբթի` փետրվարի 12-ին, հանրապետության զինված ուժերի գլխավոր շտաբը հերքել է այս տեղեկատվությունը: Հայաստանի զինված ուժերի գլխավոր շտաբի աշխատակազմի տեղեկատվական վերլուծական բաժնի պետ Սամվել Ասատրյանի մեկնաբանության մեջ ասվում է, որ «թվում է, որ ինչ-որ մեկը փորձում է ստվեր գցել» Ռուսաստանի և Հայաստանի հարաբերությունների վրա:
«Ընկերությունը չի առաջարկել այնպիսի ապրանքներ, որոնք շահարկվում են հայկական մի շարք լրատվամիջոցների կողմից, այդ թվում նաեւ` որոշ հեռուստաալիքների: Ընկերությունը չի կարող հրապարակել ապրանքների վերաբերյալ տեղեկատվությունը՝ գաղտնիության մասին կնքված պայմանագրերից եւ Հայաստանի պետական գաղտնիքների նկատմամբ հարգանքից ելնելով: Մի շարք հայկական ԶԼՄ-ների կողմից նման շահարկումների հետ կապված հարցերը կլուծվեն դատարանում` հնարավոր բոլոր միջոցների ներգրավմամբ` նման լրատվամիջոցների գործունեության հակակոռուպցիոն հետաքննության համար»,- նշել են ընկերությունում:
Ընկերությունը հեռուստաալիքի տվյալներն «անհիմն շահարկում» է անվանել: «Ընկերությունը բազմիցս իր առաջարկած ապրանքների հաջող փորձարկումներ է անցկացրել: Արտադրանքի նպատակը որոշվում է մասնագետների կողմից անցկացվող փորձարկումների միջոցով, այլ ոչ թե` շահարկումների անանուն փորձերով եւ փորձագետների կարծիքներին հղումներով, որոնց գիտելիքները հարցեր են առաջացնում»,- շեշտել են ORSIS-ում:
Հրացանների արտադրողը եւ նշանոցների մատակարարը կարծում է, որ նման գործողությունները փորձաքննության վրա ճնշում գործադրելու եւ հարուցված գործերով շեշտադրումների շեղման փորձեր են:
«Սա որեւէ կապ չունի Պաշտպանության նախարարության պաշտոնատար անձանց կողմից մրցույթի տապալման եւ խոշոր չափերի յուրացումների հետ կապված անօրինական գործողությունների փաստի հետ»,- նշել են ORSIS-ում: Ընկերությունում հետաքրքրվել են նաեւ հայաստանյան ԶԼՄ-ներում հայտնված տվյալների աղբյուրներով:
Հետաքննության մասին
Օգոստոսին Հայաստանում գրանցված ORSIS ARMS ընկերության փաստաբանը, որը ռուսական ORSIS ընկերության ռեզիդենտն է, ՏԱՍՍ-ին հայտնել էր, որ երկրի քննչական կոմիտեում քրեական գործ է հարուցվել՝ ՀՀ Պաշտպանության նախարարության կողմից խոշոր քանակությամբ զենք գնելու փակ մրցույթից բացառման պատճառով:
Հոկտեմբեր ամսվա վերջին լրատվամիջոցներում տեղեկություն էր հայտնվել այն մասին, որ Ռուսաստանը նամակ է ուղղել Հայաստանին` զենքի մրցույթի տապալման պատճառով: ՀՀ Պաշտպանության նախարարության մամուլի խոսնակ Արծրուն Հովհաննիսյանը, իր հերթին, հերքել էր ORSIS-ի հետ կապված ռուսական կողմից որևէ փաստաթղթի ստացումը` հավելելով, որ քանիդեռ դատական գործընթացը շարունակվում է, գերատեսչությունը ձեռնպահ է մնում իրավիճակի պաշտոնական գնահատականներից:
Նոյեմբերին ընկերությունում հայտարարել էին, որ «Պրոմտեխնոլոգիան» (ORSIS դիպուկահար հրացանների արտադրողը) ոչ պաշտոնական հրավերներ է ստացել ՀՀ ՊՆ-ից` այս գերատեսչության համար զենքի խմբաքանակի մատակարարման չկայացած պայմանագրի հետ կապված խնդիրների կարգավորման համար: Նաեւ ընկերության հետ ոչ պաշտոնական կապ հաստատելու փորձեր են եղել ՀՀ Պաշտպանության նախարարությանը, իբր, մոտ անձանց կողմից:
Հովհաննիսյանը հայտարարել էր, որ ՀՀ պաշտպանության նախարարությունը չի փորձել ռուսաստանյան «Պրոմեխնոլոգիա» ընկերության հետ ոչ պաշտոնական կերպով կարգավորել զենքի մատակարարման մրցույթի տապալման հետ կապված խնդիրները:
Հունվարի 27-ին Հայաստանում ORSIS-ի փաստաբան Ալեքսանդր Սիրունյանը հայտնել էր, որ Հայաստանի քննչական մարմինները գործի քննության շրջանակներում հարցաքննության են կանչել «Պրոմտտեխնոլոգիա»-ի տնօրենների խորհրդի անդամ Սիմոն Ամիրովին:
