Ռուսատանի զբոսաշրջության դաշնային գործակալությունը եւ Հայաստանի էկոնոմիկայի նախարարությունը երկու երկրների միջեւ կնքված Զբոսաշրջության ոլորտում համաձայնագրի շրջանակում գործողությունների ծրագիր են ընդունել։ Ռուսաստանի եւ Հայաստանի զբոսաշրջության ոլորտում համագործակցությանը նվիրված ապրիլի 19-ի քննարկման ընթացքում այս մասին տեղեկացրեց Հայաստանի էկոնոմիկայի փոխնախարար Արա Պետրոսյանը։
Ըստ նրա՝ տուրիստական նպատակով Հայաստան այցելուների քանակով Ռուսաստանն, այլ երկրների շարքում առաջին տեղն է զբաղեցնում։ Պետրոսյանի խոսքով 2009թ. Ռուսաստանից Հայաստան է այցելել 123 հազար զբոսաշրջիկ։
Հիշեցնենք, որ Ռուսատանի զբոսաշրջության դաշնային գործակալության ղեկավար պաշտոնակատար Ալեքսանդր Ռադկովի խոսքով՝ Հայաստանը լավ հնարավորություններ ունի ավելացնելու տուրիստների հոսքը Ռուսաստանից։ Ըստ Ռադկոյի՝ ռուսաստանցիները սիրում են ծով եւ արեւ, որովհետեւ երկիրը հյուսիսային է, այդ պատճառով ռուս տուրիստների հիմնական ուղղությունները Թուրքիան եւ Եգիպտոսն են, սակայն ռուսաստանցիների շրջանում ավելացել է հետաքրքրությունը դեպի մշակութային տուրիզմը։ «Այս առումով Հայաստանը լավ հնարավորություն ունի ամենաշատն ընդունել ռուսաստանցի տուրիստների»,- ասել է Ռադկովը։
