ՌԴ արտգործնախարար Սերգեյ Լավրովը քննադատել է վրացի լրագրողուհիներին անտեղի վարքագծի համար, հայտնում է ՌԻԱ Նովոստին։
Համացանցում հրապարակված կադրերում երեւում է, թե ինչպես են վրացական մամուլի, մասնավորապես Imedi եւ 1TVGe հեռուստաալիքների ներկայացուցիչները միմյանց հրելով եւ ընդհատելով փորձում հարց տալ ՌԴ ԱԳ նախարարին։ «Դուք ինչ-որ բանով․․․ դուք հիվանդ եք, աղջիկներ»,- ասում է Լավրովը։
Ավելի վաղ Ռուսաստանի ԱԳՆ պաշտոնական ներկայացուցիչ Մարի Զախարովան պատմել էր, որ վրացի լրագրողուհիները Ժնեւում ՄԱԿ բաժանմունքում հարձակվել են ռուսական պատվիրակության վրա՝ հարցնելով, թե կգա արդյոք Լավրովը Թբիլիսի։ Զախարովան հայտնել է, թե իրեն ու գործընկերոջը հրել են, սակայն նախարարը չի տուժել։ Աղջիկների վարքագիծը Զախարովան անվանել է «խղճուկ տեսարան»։
Թբիլիսիում մայիսի 14-15-ը կանցկացվի Եվրոպայի խորհրդի նախարարների կոմիտեի խորհրդակցություն, որտեղ ռուսական պատվիրակությունը ավանդաբար ներկայացնում է ԱԳՆ ղեկավարը։ Վրացական ընդդիմության ներկայացուցիչները կոչ են արել թույլ չտալ Լավրովի այցը Թբիլիսի։ Ընդ որում, Վրաստանի նախագահ Սալոմե Զուրաբիշվիլին հայտարարել է, որ Թբիլիսիում պատրաստ են ընդունել ռուսական պատվիրակությանը։
