Ավստրալիական ամառը ներկայում երկու անգամ երկար է ձմեռվանից, քանի որ կլիմայի փոփոխությունը հանգեցրել է ջերմաստիճանի բարձրացմանը անցյալ հարյուրամյակի կեսից։ Այս մասին են վկայում հետազոտությունները, որոնք հրապարակվել են երկրում աննախադեպ հրդեհներից հետո, հայտնում է Reuters-ը։

Ավստրալիական ինստիտուտի զեկույցում համեմատվում են վերջին երկու տասնամյակների տվյալները՝ 20-րդ դարի կեսերին երկրի չափավոր եւ մերձարեւադարձային մասերում սեզոնի սկզբի ջերմաստիճանի ցուցանիշներով։

Վերջին երկու տասնամյակների ընթացքում Ավստրալիայի մեծ մասում ամառը տեւել է միջինը մեկ ամիս ավելի երկար, քան կես դար առաջ, իսկ ձմեռը կրճատվել է միջինը երեք շաբաթով։

Ուսումնասիրությունը ցույց է տվել, որ վերջին հինգ տարիներին ավստրալիական ամառը եղել է միջինը 50 տոկոսով ավելի երկար, քան 20-րդ դարի կեսին։

Ավստրալիան հաշվել է անտառային հրդեհների ավերիչ եւ շարունակական սեզոնի արժեքը, որի հետեւանքով այրվել է մոտ 12 միլիոն հեկտար անտառային տարածք, զոհվել է 33 մարդ եւ մոտ 1 միլիարդ կենդանի։

«Սեւ ամառը», ինչպես այն անվանել է վարչապետ Սքոթ Մորիսոնը, անսովոր երկարատեւ ու ինտենսիվ անտառային հրդեհներով ուժեղացրել է կառավարության վրա ճնշումը՝ նպատակ ունենալով կրճատել ջերմոցային գազերի արտանետումները։

Գիտնականները նախազգուշացնում են, որ ջերմաստիճանի բարձրացումը եւ ջերմային ալիքները կհանգեցնեն ավելի վտանգավոր սեզոնային հրդեհների եւ խիստ եղանակային երեւույթների, իսկ առավել կարճ ձմեռները կնեղացնեն վտանգի նվազեցման պատուհանը, որպեսզի մեղմացնեն հրդեհների ազդեցությունը։