Հայաստանի ԱԻՆ-ը նախատեսում է ամերիկյան «911» կամ եվրոպական «112» ծառայություններին համարժեք փրկարար նոր ստորաբաժանում ստեղծել։ Ինչպես ապրիլի 22-ին լրագրողների հետ հանդիպման ժամանակ ասաց ԱԻ նախարար Արմեն Երիցյանը, սպասվում է, որ այս մտադրությունն իրականություն կդառնա շատ մոտ ապագայում։

Ինքը՝ նախարարն առավել հակված է ամերիկյան տարբերակին։ «Կառավարության համապատասխան որոշումն արդեն կա։ Ծառայության կենտրոնը կգտնվի Դավիթաշենում»,- հայտնեց Երիցյանը։ Նրա խոսքով, կենտրոնում կաշխատի լեզուների պարտադիր իմացությամբ 30-40 մասնագետ։

Դիմել կարելի է ցանկացած հարցով,  նույնիսկ՝ կենդանիների փրկության։ «Հիմա էլ մեզ կանչում են, ասենք, ծառից վախեցած կատուների իջեցնելու համար»։

Ինչպես ավելի վաղ նշել էր նախարարը, նոր կառույցին զուգահեռ՝ կշարունակեն գործել 1-01-ը (հրշեջ ծառայություն), 1-02-ը (ոստիկանություն), 1-03-ը (շտապօգնություն)։