Երեւանում ապրիլի 23-ին` ժամը 20:00-ին մեկնարկել է ավանդական ցույցը եւ ջահերով սգո երթը դեպի Ծիծեռնակաբերդի հուշահամալիր (ֆոտոռեպորտաժ):
Հազարավոր մարդիկ հայկական դրոշներով ու պաստառներով, հավաքվել էին Երեւանի կենտրոնում` Ֆրանսիայի հրապարակում: Նրանց ձեռքի պաստառներում կոչ է արվում Թուրքիային ճանաչել Հայոց ցեղասպանությունը:
Մարդիկ արտահայտում են իրենց բողոքը Թուրքիայի մերժողական քաղաքականության դեմ, մինչդեռ աշխարհի տասնյակ պետություններ ճանաչել են Հայող ցեղասպանությունը:
Երթից առաջ, սովորության համաձայն, երիտասարդները ցուցադրաբար այրել են Թուրքիայի դրոշը, այնուհետեւ, ոտքով, ջահերը ձեռքներին, շարժվել դեպի հուշահամալիր, որը մինչ այդ արդեն հեղեղված է լինում ծաղիկներով ու պսակներով:
Մինչ երթի մեկնարկը հավաքվածներին է դիմել ՀՅԴ խմբակցությունից Ազգային ժողովի պատգամավոր Վահան Հովհաննիսյանը, նշելով, որ ջահերով երթը հայ ժողովրդի միասնականության խորհրդանիշն է, իսկ կրակը մարմնավորում է հայ ժողովրդի ոգին եւ միասնականությունը, ինչպես նաեւ ժողովրդի հավերժական պայքարը:
«Մենք պետք է սովորենք հարաբերվել թուրքերի հետ, նրանց հետ խոսել հավասարը հավասարի պես: Մեզ պետք չէ թուրքերի կեղծ ներողությունը, մենք իրական հատուցում ենք պահանջում»,- ասաց Հովհաննիսյանը, հավելելով, որ ջահերով երթը տարեց տարի ավելի ու ավելի շատ քաղաքներ է ներառում` Մոսկվա, Լոս-Անջելես, Թբիլիսի, Ստեփանակերտ եւ Հայաստանի 13 քաղաքներ:
Ամփոփելով` նա նշեց, որ Ցեղասպանությունը զրկեց մեզ մարդավայել ապրելու իրավունքից եւ Հայաստանի ներկայիս վիճակը բացասական բոլոր առումներով Ցեղասպանության հետեւանք է: Բայց հայ ժողովուրդը շարունակելու է պայքարել նոր հնարավորությունների եւ ապագայի համար:
Հիշեցնենք, որ Հայոց ցեղասպանության փաստը ճանաչել են բազմաթիվ երկրներ, որոնցից առաջինը` 1965 թվականին Ուրուգվայը, որի օրինակին են հետեւել Ռուսաստանը, Ֆրանսիան, Իտալիան, Գերմանիան, Հոլանդիան, Բելգիան, Վենեսուելան, Արգենտինան, ԱՄՆ-ի 42 նահանգները: Հայոց ցեղասպանության փաստը ճանաչել են նաեւ Վատիկանը, Եվրախորհրդարանը, եւ Եկեղեցիների համաշխարհային խորհուրդը:
Լուսանկարը եւ տեսանյութը՝ Արսեն Սարգսյանի
