Բելառուսի եւ Հայաստանի միեւնույն դիրքորոշումը գազի գնի վերաբերյալ տրամաբանական է` հաշվի առնելով, որ երկու երկրներն էլ ելք չունեն դեպի ծով, ինչը մեծացնում է բոլոր տեսակի ռիսկերը կորոնավիրուսի տարածման հետեւանքով, ուստի հարցը չպետք է դիտարկել քաղաքական համատեքստում: Այս մասին է ապրիլի 9-ին գազի շուրջ հայ-ռուսական բանակցությունների թեմայով քննարկմանն ասաց էներգետիկայի հարցերով ՄԱԿ-ի ազգային փորձագետ Արա Մարջանյանը:
Նա հավելեց, որ այս կապակցությամբ գնի փոփոխման վերաբերյալ բանակցություններ սկսելու հայկական կողմի նախաձեռնությունը հիմք ունի:
Միեւնույն ժամանակ, փորձագետը շեշտեց, որ «Գազպրոմ Արմենիա» ՓԲԸ-ի հայտը, որը ընկերությունը, ամենայն հավանականությամբ, կներկայացնի, եւս հիմքեր ունի: «Դրանց թվում է նաեւ այն փաստը, որ անցած մեկ տարվա ընթացքում «Գազպրոմ Արմենիա»-ն պահպանում էր ներքին սակագները սեփական մարժայի կրճատման հաշվին: Ընկերության համար բիզնես շահն ավելի կարեւոր է, բայց շահերի վրա հիմնված լուծում կարելի է գտնել եւ երկարաժամկետ պայմանավորվածություն ձեռք բերել` հաշվի առնելով գների հավանական տատանումները: Հայաստանը կարող է ապավինել Ռուսաստանի ըմբռնողությանը»,- նշեց նա:
Հիշեցնենք, որ մարտի վերջին փոխվարչապետ Մհեր Գրիգորյանը ՀՀ Կառավարության անունից նամակով դիմել էր «Գազպրոմ»-ի կառավարման խորհրդի նախագահ Ալեքսեյ Միլլերին` մատակարարվող գազի գնի փոփոխման վերաբերյալ նոր բանակցություններ սկսելու մասին: