Ucom եւ VEON ընկերությունների հայտը ուսումնասիրման փուլում է, եւ երեկվա գործընթացները ոչ մի կապ չունեն Հանձնաժողովի որոշման հետ: Այս մասին ապրիլի 10-ին լրագրողների հետ հանդիպման ժամանակ ասաց Տնտեսական մրցակցության պաշտպանության պետական հանձնաժողովի ղեկավար Գեղամ Գեւորգյանը:
Նրա պարզաբանմամբ՝ Հանձնաժողովն ուսումնասիրել է 600-ից ավելի փաստաթղթեր, դրանից բացի՝ հանդիպումներ են անցկացվել կողմերի հետ:
«Ուսումնասիրությունները դեռեւս չեն ավարտվել, եւ առայժմ որոշում չկա, Հանձնաժողովը դեռեւս վերջնական դիրքորոշում չունի: Վարույթի վերսկսումից հետո գործընթացը կշարունակվի, որի արդյունքների մասին տեղեկություն կտրամադրվի»,- նշեց Գեւորգյանը:
Նա հավելեց, որ եթե ինչ-որ գործընթացների հետեւանքով աշխատակիցներ են հեռանում, ապա պետությունը ապագայի համար պետք է սխեմա ունենա, որ խուսափի դրա հետ կապված հեռահաղորդակցության աշխատանքի հնարավոր խափանումից:
Հիշեցնենք, որ Հայաստանում ֆիքսված եւ շարժական կապի ծառայություններ մատուցող հայկական Ucom ընկերությունն ավելի վաղ հաստատել էր կապի եւ ինտերնետ ծառայություններ մատուցող համաշխարհային առաջատար VEON Ltd. ընկերության հայաստանյան բիզնեսը՝ Beeline-ը գնելու շուրջ քննարկումների փաստը: Հայտ է ներկայացվել ՏՄՊՊՀ, սակայն «Բիլայն»-«Յուքոմ» միավորման գործարքը դեռեւս տեղի չի ունեցել, քանի որ արտակարգ դրությամբ պայմանավորված ՏՄՊՊՀ-ն մարտի 19-ին իր ձեռքի տակ եղած վարույթների ժամկետները ժամանակավորապես կասեցրել է:
Ավելի վաղ հաղորդվել է, որ «Յուքոմ»-ի ավելի քան 800 աշխատակից աշխատանքից ազատման դիմում է գրել: