Ռուսական կողմը հույս ունի, որ վերջին մի քանի տարում Հայաստանի հետ համատեղ ձեռնարկությունների նկատմամբ սկսված դատավարությունները կկարգավորվեն: Այս մասին երեքշաբթի օրը Ա. Գորչակովի անվան հանրային դիվանագիտության աջակցության հիմնադրամի ներկայացուցիչների հետ տեսակոնֆերանսի ձեւաչափով կլոր սեղանի ընթացքում հայտարարել է Ռուսաստանի արտգործնախարար Սերգեյ Լավրովը, հայտնում է ՏԱՍՍ-ը:
«Եթե խոսենք տնտեսության մասին, ապա մենք հույս ունենք, որ այն դատական գործընթացները, որոնք այժմ սկսվել են վերջին մի քանի տարիներին Հայաստանում համատեղ ձեռնարկությունների նկատմամաբ, այդ թվում` Հարավկովկասյան երկաթուղու հետ կապված, կկարգավորվեն առանց այնտեղ բաներ բերելու որեւէ փորձերի, որոնք հարիր չեն դաշնակիցների միջեւ հարաբերություններին»,- ասաց նա: Ինչպես նշեց Լավրովը, «բարդ իրավիճակներ» են ստեղծվել մի քանի ռուսական ընկերությունների հետ: «Հուսով եմ, որ այս բոլոր հարցերը մենք կկարգավորենք փոխադարձ բավարարմամբ»,- եզրափակեց նա:
Գործակալության տվյալներով` Ռուսաստանի երկաթուղիների հարաբերությունները Հայաստանի իշխանությունների հետ սրվել են խուզարկությունների եւ քրեական գործերի պատճառով, որոնք Երեւանը հարուցել էր ՀԿԵ-ի դեմ: Մասնավորապես, 2018-ի օգոստոսին ՀԿԵ-ի հայաստանյան գրասենյակում խուզարկություններ էին անցկացվել` 19 հազար ԱՄՆ դոլարի չաթով հարկեր չվճարելու գործի շրջանակներում: Ընկերությունում ի պատասխան հայտարարել էին քննության կանխակալության մասին:
Ընդհանուր առմամբ, ՀԿԵ դեմ, RTVI հեռուստաալիքի տեղեկությունների համաձայն, յոթ գործ է հարուցվել, որոնք միացված են մեկ դատավարության մեջ: ՀԿԵ-ում պահանջներն անհիմն են համարում: «Հայկական երկաթուղի» ընկերությունը 2008-ին հանձնվել էր «Ռուսաստանի երկաթուղիներ» ընկերության կոնցեսիոն կառավարմանը: Ռուսական ընկերությունը կարող է 30 տարի կառավարել այդ ճանապարհները:
