Քաղաքական գիտության Հայաստանի ասոցիացիան (նախագահը Հայկ Քոթանջյանն է) դիմել է Հայաստանի նախագահ Սերժ Սարգսյանաին խնդրանքով` «ներում շնորհել ներկայումս ազատազրկման մեջ գտնվող 2008 թ. մարտի 1-ի դեպքերի մասնակիցներին»:
Ասոցիացիայի նամակում, մասնավորապես, ասվում է.
«Ներում շնորհելու նախագահի որոշումը կլինի պետության ղեկավարին արժանի պատասխանատու քայլ` միտված հասարակության շահագրգիռ բոլոր խմբերի միջեւ ներքաղաքական երկխոսության առաջ մղմանը` ուղղված ողջ ժողովրդի ջանքերի համախմբմամբ Հայաստանի ազգային անվտանգության եւ կայուն, ժողովրդավարական զարգացման առաջնահերթությունների շուրջ համահայկական կոնսենսուսի ձեւավորմանը:
Ներքաղաքական հակամարտությունը օրինապատշաճ քաղաքական մրցակցության կերպափոխելու այս նախաձեռնությունը ենթադրում է մեր ազգային պետության ճակատագրի համար պատասխանատվության բաշխում Հայաստանի Նախագահի եւ քաղաքական բոլոր ուժերի միջեւ, ինչը ՀՀ-ի եւ ԼՂՀ-ի զարգացման ու անվտանգության արդյունավետ ապահովման գործում ազգի համախմբմանն ուղղված անհրաժեշտ քայլ է, հատկապես մեր պետությունների դեմ Ադրբեջանի ագրեսիվ շրջանների կողմից ծրագրվող պատերազմի վերսկսման սպառնալիքի համատեքստում:
Ներման շնորհումը կարող է դառնալ Հայաստանի եւ համաշխարհային հայության բոլոր առաջադեմ հայրենասիրական ուժերի համախմբման հիմք` նրանց առավել ուժեղ կողմերի օգտագործմամբ հանուն կառուցողական քաղաքական համագործակցության` ուղղված ՀՀ-ում համակարգային ժողովրդավարական բարեփոխումների առաջ մղմանը:
2008 թ. մարտի 1-ի դեպքերի առնչությամբ կալանավորվածներին ներում շնորհելու Ձեր որոշումը կլինի բարի կամքի դրսեւորում` ուղղված ազգային ջանքերի համախմբմամբ մեր պետության զարգացմանը, միջազգային ասպարեզում նրա դրական իմիջի ամրապնդմանը, ինչպես նաեւ ողջ հասարակության ջանքերով ազգային անվտանգության ապահովմանը»: