Օպերատիվ տվյալների համաձայն` արտոնյալ պայմաններով գյուղատնտեսական ապահովագրության շուրջ 800 պայմանագիր է կնքվել: Այս մասին մայիսի 12-ին NEWS.am-ի թղթակցի հետ զրույցում հայտարարել է ՀՀ Էկոնոմիկայի նախարարի մամուլի խոսնակ Աննա Օհանյանը:
Նա հիշեցրել է, որ ծրագրով նախատեսված բոլոր մշակաբույսերի համար կարկուտի ռիսկերից պայմանագրեր կնքելու վերջնաժամկետը, այդ թվում` խաղողի, ծիրանի, խնձորի, դեղձի, աշնանացանի եւ գարնանացանի ցորենի, երկարացվել է մինչեւ մայիսի 15-ը: Օհանյանը պարզաբանել է, որ վնասների գնահատման վերաբերյալ անկախ փորձագետների մոնիտորինգն իրականացվում է երկու փուլով:
«Գնահատումների առաջին փուլը կատարվում է միջադեպի կամ կատապլիզմի հետ կապված ազդանշանից անմիջապես հետո, երկրորդը` բերքահավաքից անմիջապես առաջ: Սակայն Արմավիրի մարզում, օրինակ, նման ծանր վնասի դեպք արդեն արձանագրվել է, եւ մոնիտորինգի երկրորդ փուլի անցկացման անհրաժեշտության կարիք չկա, եւ փոխհատուցման մասին որոշումն արդեն կայացվել է»,- եզրափակել է Օհանյանը: