Լիբիայի ժամանակավոր կառավարությունը 2020 թվականի ապրիլի 24-ին կրկին ճանաչել է Հայոց ցեղասպանությունը, իր նոր հոդվածում նշում է Հարութ Սասունյանը, փոխանցում է Mirror-Spectator-ը:
Ըստ հոդվածի՝ այս ճանաչումը կարող է զարմացնել շատերին, քանի որ Լիբիայում հայեր գրեթե չկան, սակայն նրանց գործողությունը կարելի է հիմնավորել աշխարհաքաղաքական պատճառներով:
«2012 թվականին Լիբիայի առաջնորդ Մուամար Քադաֆիի տապալումից եւ սպանությունից հետո երկրիը մշտապես եղել է Լիբիայում կառավարելու համար միմյանց դեմ մարտնչող տարբեր ռազմական խմբավորումների խլրտումների մեջ:
Լիբիայի պաշտոնապես ճանաչված կառավարությունը սահմանափակված է առափնյա Տրիպոլիով եւ Միստրատայով, այն դեպքում, երբ լիբիական տարածքի մեծ մասը օկուպացված է ռազմական առաջնորդ Խալիֆ Հաֆթարի գլխավորած ժամանակավոր կառավարության կողմից: Ներքին քաղաքացիական պատերազմը զգալիորեն ընդլայնվեց Լիբիայի ներքին գործերին արտաքին ուժերի միջամտությամբ: Թուրքիան եւ Կատարը կենտրոնական կառավարությանն աջակցում են իսլամական զինյալների եւ ռազմական տեխնիկայի օգնությամբ, մինչդեռ Եգիպտոսը, Սաուդյան Արաբիան եւ Արաբական Միացյալ Էմիրությունները աջակցել են ժամանակավոր կառավարությանը:
Հակամատող կողմերի երկրները Լիբիայում ներգրավված են նաեւ դիվանագիտական բախումների եւ լրատվամիջոցների դեմ պատերազմի մեջ: Սաուդյան Արաբիան անցյալ ամիս հայտարարել էր, որ արգելափակում է հասանելիությունը թուրքական լրատվական գործակալություններին եւ վեբ-կայքերին: Թուրքիան իր հերթին արգելափակել էր Սաուդյան Արաբիայի եւ Էմիրությունների լրատվական գործակալությունները»,- նշում է հեղինակը՝ հավելելով, որ Թուրքիայի նախագահ Ռեջեփ Թայիփ Էրդողանն աջակցում է «Մուսուլման եղբայրներին», իսկ Սաուդյան Արաբիան, Եգիպտոսը եւ ԱՄԷ-ն նրանց դեմ են հանդես գալիս:
Ըստ հեղինակի՝ Եգիպտոսն ու Թուրքիան թշնամացել են այն ժամանակից ի վեր, երբ 2013 թվականին տապալվեց Եգիպտոսի «Մուսուլման եղբայրների» նախագահ Մուհամմեդ Մուրսին՝ Թուրքիայի աջակցության պայմաններում: Եգիպտոսը, Սաուդյան Արաբիան եւ ԱՄԷ-ն դիմել են իրենց քաղաքացիներին՝ խնդրելով բոյկոտել Թուրքիայից ապրանքները եւ խուսափել Թուրքիա ուղեւորություններից:
«Այս տարատեսակ կրոնական եւ ներքին երկպառակությունները դարձել են 2020 թվականի ապրիլի 24-ին Լիբիայի ժամանակավոր կառավարության արտաքին գործերի եւ միջազգային համագործակցության նախարարության կողմից Հայոց ցեղասպանության ճանաչման պատճառը»,- նշում է Սասունյանը՝ ներկայացնելով անգլերենով թարգմանած Ցեղասպանության ճանաչման տեքստը:
Տեքստի համաձայն՝ Լիբիայի ժամանակավոր կառավարությունը, մասնավորապես, նշում է, որ հայ ժողովրդի դեմ Թուրքիայի հանցավոր գործողությունները մարդկության դեմ հանցագործություն են, որոնք պետք է ճանաչվեն:
2019 թվականի ապրիլի 19-ին եւս Լիբիայի ժամանակավոր կառավարությունը արտաքին գործերի նախարարության միջոցով համանման հայտարարություն էր հրապարակել:
Զարմանալի չէ, որ լիբիական ժամանակավոր կառավարությունը հանդես է եկել Հայոց ցեղասպանության մասին հայտարարությամբ, քանի որ դա ծառայում է հակաթուրքական քաղաքական ծրագրին, նշում է Սասունյանը:
Հոդվածի հեղինակլը նաեւ նշում է, որ արդեն երկրորդ տարին անընդմեջ Լիբիայի ժամանակավոր կառավարությունը ճանաչում է Հայոց ցեղասպանությունը, իսկ թե ինչպիսին է եղել Հայաստանի կառավարության արձագանքը՝ հայտնի չէ:
