Միջազգային էներգետիկ գործակալությունը (ՄԷԳ) բիզնեսի եւ մարդկանց տեղաշարժի համար սահմանափակումների վերացման ֆոնին օրական 0.7 միլիոն բարելով բարելավել է իր գնահատականները 2020 թվականին նավթի պահանջարկի անկման վերաբերյալ` օրական 9.3 միլիոն բարելից մինչեւ օրական 8.6 միլիոն բարել, հետեւում է գործակալության մայիսյան զեկույցից, փոխանցում է ՏԱՍՍ-ը:
ՄԷԳ-ը կարծում է, որ տեղաշարժի սահմանափակումների աստիճանական մեղմումն օգնում է վերականգնել պահանջարկը: Գործակալության գնահատականներով՝ մինչեւ մայիսի վերջը 2.8 միլիարդ մարդ ամբողջ աշխարհում կգտնվի այս կամ այն սահմանափակման տակ:
«Չնայած նրան, որ շատերը դեռ սահմանափակումների տակ են գտնվում, բիզնեսի մի մասը կրկին սկսում է աշխատել, որոշ մարդիկ վերադառնում են աշխատանքի, ինչը նավթի պահանջարկի աճի է հանգեցնում: Հաշվի առնելով այդ հանգամանքները՝ մենք բարձրացրել ենք պահանջարկի մեր գնահատականը: Նախորդ կանխատեսումը բարելավվել է մինչեւ օրական 8.6 միլիոն բարել»,- նշվում է զեկույցում:
Ապրիլյան զեկույցում ՄԷԳ-ը կանխատեսում էր, որ 2020 թվականին նավթի համաշխարհային պահանջարկը կնվազի կորոնավիրուսի տարածման պատճառով՝ հասնելով օրական ռեկորդային 9,3 միլիոն բարելի: