Որոշ ոստիկաններ միանում են ամերիկյան քաղաքներում ընթացող բողոքի խաղաղ ցույցերին՝ ի հիշատակ Մինեապոլիսում (Մինեսոտա նահանգ) մահացած աֆրոամերիկացի Ջորջ Ֆլոյդի: Երկուշաբթի NBC հեռուստաընկերությունը հայտնել է, որ դա տեղի է ունեցել վերջին մի քանի օրերին Կալիֆոռնիա, Նյու Յորք, Միչիգան, Օկլահոմա, Տեխաս նահանգներում, փոխանցում է ՏԱՍՍ-ը:
«Նյու Յորքի ոստիկանների մասնակցությամբ տեսանյութը, որոնք կիրակի փողոցում ծնկի են եկել ցուցարարների հետ միասին, վկայում է ամերիկյան իրավապահ մարմինների շարքերում տեղի ունեցած պառակտման մասին, որն արտահայտվել է այն փաստով, որ կարգի որոշ պահապաններ դատապարտել են իրենց գործընկերների պահվածքը, որը հանգեցրել է Ֆլոյդի մահվանը, եւ միացել են ցուցարարներին»,- նշել է NBC-ն:
Հեռուստաընկերությունը մեջբերել է Հյուսթոնի (Տեխաս նահանգ) ոստիկանապետ Արթ Ասեվիդոյի խոսքը, որտեղ մեծացել է Ֆլոյդը եւ ապրում է նրա ընտանիքը. «Ֆլոյդի մահը պետք է դատապարտեն իրավապահ մարմինների բոլոր աշխատակիցները»: Նա անցյալ շաբաթ մասնակցել է քաղաքում տեղի ունեցած բողոքի երթին: Ասեվիդոն հրապարակայնորեն աջակցություն է հայտնել նրանց, ում վրդովել է մայիսի 25-ին Մինեապոլիսում տեղի ունեցած միջադեպը:
Միչիգան նահանգի Ֆլինթ-Թաունշիլ փոքր քաղաքի Ջենեսի շրջանի շերիֆ Քրիս Սվանսոնը, երբ շաբաթ ցուցարարները մոտեցել են ոստիկանական տեղամասի շենքին, նրանց ընդառաջ է գնացել, հանել սաղավարտը եւ ասել. «Մենք իսկապես ցանկանում ենք հիմա ձեզ հետ լինել»,- հայտնում է NBC-ն: Սանտա Կրուսում (Կալիֆոռնիա նահանգ) ոստիկանապետ Էնդի Միլսը քաղաքապետ Ջասթին Քամինգսոմի հետ միասին նույնպես միացել է երթին, որպեսզի «ուշադրություն հրավիրի աֆրոամերիկացիների հանդեպ բռնի գործողությունների հանդեպ»:
