Եվրոպական Կենտրոնական բանկը պահպանել է տոկոսադրույքների մակարդակը եւ հայտարարել է արտակարգ ակտիվների գնման ծրագրի (PEPP) ծավալի՝ 600 միլիարդ եվրոյով՝ մինչեւ 1.35 տրիլիոն եվրո ավելացման մասին, փոխանցում է Reuters-ը:
Կարգավորողը ծրագրում չի ներառել «աղբային» բոնդերը, սակայն հայտնել է, որ PEPP- շրջանակներում ակտիվների գնման հորիզոնը կերկարաձգվի առնվազն մինչեւ 2021 թվականի հունիսի վերջ:
«Կառավարիչների խորհուրդն ամեն դեպքում PEPP-ի շրջանակներում ակտիվների զուտ գնումներ կիրականացնի այնքան ժամանակ, որքան կհամարի, որ կորոնավիրուսի ճգնաժամային փուլն ավարտված է»,- նշվում է ԵԿԲ-ի հաղորդագրության մեջ:
Դեպոզիտային տոկոսադրույքը մնացել է մինուս 0.50 տոկոսի մակարդակում, վերաֆինանսավորման հիմնական տոկոսադրույքը, որը որոշում է վարկավորման արժեքը տնտեսության մեջ, 0.0 տոկոս է, իսկ բանկերի համար արտակարգ վարկավորման տոկոսադրույքը՝ 0.25 տոկոս:
