Դիմակի չկրելու համար բերման ենթարկված քաղաքացու փաստաբանը չի դիմել բողոքով: Այս մասին այսօր՝ հունիսի 9-ին, ԱԺ մշտական հանձնաժողովների համատեղ նիստում 2019-ի պետական բյուջեի կատարողականի մասին զեկույցի քննարկման ընթացքում հայտարարեց Մարդու իրավունքների պաշտպան Արման Թաթոյանը:
Նա նշեց, որ տեսանյութի ուսումնասիրությունից հետո օմբուդսմենի գրասենյակի ներկայացուցիչները այցելել են ոստիկանության բաժանմունք, որպեսզի հանդիպեն բերման ենթարկվածի հետ:
«Իրավախախտում թույլ տված յուրաքանչյուր անձ պետք է պատասխանատվության ենթարկվի, սակայն պետության եւ իրավապահ մարմինների գործողությունները պետք է համաչափ լինեն»,-նշեց Արման Թաթոյանը:
Օմբուդսմենի խոսքով՝ բերման ենթարկվածի փաստաբանը պետք է բողոք ներկայացներ, սակայն նման բան տեղի չի ունեցել, եւ այդ պատճառով ՄԻՊ գրասենյակը հետագա քայլեր չի ձեռնարկել:
Հիշեցնենք, որ հունիսի 5-ին համացանցում տեսանյութ էր հրապարակվել, որում երեւում էր՝ ինչպես են ոստիկանները ծալում դիմակ չկրած քաղաքացու ձեռքերն ու բերման ենթարկում դիմակ կրելու պահանջից հրաժարվելու համար: Տղամարդն ասել է, որ խեղդվում է, սակայն ոստիկանները շարունակել են նրան հրել եւ գցել ասֆալտին:
