Իսրայելական Ռազմաօդային ուժերի չորս կործանիչները խախտել են Լիբանանի օդային սահմանները եւ հայտնվել են Բեյրութի երկնքում: Այս մասին հայտնել է Al-Manar հեռուստակայանը՝ վկայակոչելով Լիբանանի բանակի հրամանատարության հայտարարությունն այս կապակցությամբ:
Հաղորդվում է, որ ինքնաթիռները հայտնվել են ծովի կողմից քաղաքի հարավային արվարձանների երկնքում եւ ափի երկայնքով թռել են դեպի երկրի հյուսիս, փոխանցում է ՏԱՍՍ-ը:
Ավելի վաղ դրանք հետախուզական թռիչքներ էին կատարում հարավային շրջաններում եւ Շուֆ, Ալեյ եւ Բաաբդա լեռնային շրջաններում: Միեւնույն ժամանակ, Լիբանանի ծովային սահմանի խախտում է գրանցվել Իսրայելական նավատորմի նավակների կողմից:
Լիբանանը բազմիցս բողոքներ է հղել ՄԱԿ-ի Անվտանգության խորհուրդ՝ մեղադրելով Իսրայելին իր ինքնիշխանության խախտման համար, այդ թվում՝ հարեւան Սիրիայի ռազմական օբյեկտներում հրթիռային հարվածներ հասցնելու նպատակով: Ըստ հանրապետության արտաքին գործերի նախարար Նասիֆ Հիթիի՝ «այս իսրայելական ներխուժումները միջազգային հանրության բանաձեւերի կոպիտ խախտում են եւ վտանգում են գլոբալ խաղաղությունն ու անվտանգությունը»:
Հունիսի 3-ին Լիբանանի վարչապետ Հասան Դիաբը, ելույթ ունենալով հինգ պետությունների դեսպանների առջեւ, որոնք ՄԱԿ-ի Անվտանգության խորհրդի մշտական անդամ են, ասել էր, որ Իսրայելը 2019-ին 2.551 անգամ խախտել է Լիբանանի ինքնիշխանությունը: Ըստ նրա՝ 2020-ի սկզբից ի վեր Իսրայելի ռազմաօդային ուժերն «ավելի քան 250 անգամ ներխուժել են Լիբանանի օդային տարածք, 374 խախտում է արձանագրվել ցամաքում, իսկ ծովում՝ 386»:
Լիբանանում ՄԱԿ-ի ժամանակավոր ուժերի հրամանատարությունը իսրայելական ավիացիայի թռիչքները ՄԱԿ-ի թիվ 1701 բանաձեւի խախտում է համարում, որը հրադադար էր հաստատել սահմանին 2006-ի ամռանը հակամարտության ավարտից հետո: Այնուամենայնիվ, իսրայելական զորքերն արդարացնում են նման թռիչքները շիական «Հեզբոլլահ» զինված ոստիկանության գործողություններին հետեւելու անհրաժեշտությամբ, որոնց զինյալները Սիրիայի կռվում են կառավարական ուժերի կողմից:
