Ռուսաստանի եւ այլ երկրների միջեւ օդային հաղորդակցությունը կարող է վերսկսվել հուլիսի 15-ից, եւ հատուկ ուշադրություն է դարձվելու Եվրասիական տնտեսական միության երկրներին: Սակայն կոնկրետ երկրի վերաբերյալ որոշում կկայացվի՝ հաշվի առնելով այնտեղ առկա համաճարակաբանական իրավիճակը: Այս մասին հունիսի 11-ին առցանց մամուլի ասուլիսին ասաց Հայաստանում Ռուսաստանի արտակարգ եւ լիազոր դեսպան Սերգեյ Կոպիրկինը:
«Ինչ վերաբերում է աշխատանքային միգրանտներին, ապա կորոնավիրուսի պատճառով աշխատանքային գործունեության շարունակությունը խնդրահարույց է դառնում: Խնդիրը կկարգավորվի տնտեսության վերականգնմանը զուգահեռ, այլ սահմանափակիչ գործոններ ես չեմ տեսնում»,- շեշտեց դեսպանը:
Նշենք, որ հունիսի 10-ի առավոտի դրությամբ Հայաստանում գրանցվել է կորոնավիրուսով վարակման ընդհանուր 14103 դեպք: Երկիրը շարունակում է այս ցուցանիշով առաջինը մնալ Կովկասում:
