Ես ԱԺ դահլիճում դիմելով վարչապետին կոչ եմ արել, որ հավաքների ազատության մասով պարետատան որոշումը վերանայել եւ հնարավորություն տալ մարդկանց դիմակներով, սոցիալական հեռավորությունը պահպանելով հայտնել իրենց բողոքը կամ անցկացնել իրենց հավաքը: Այս մասին, այսօր՝ հունիսի 17-ին, ԱԺ-ում լրագրողների հետ զրույցում նշեց ԱԺ «Լուսավոր հայաստան» խմբակցության ղեկավար Էդմոն Մարուքյանը՝ անդրադառնալով ԲՀԿ նախաձեռնությանը, որն առաջարկում է դիմել ՍԴ եւ վիճարկել արտակարգ դրության պայմաններում հավաքների կազմակերպման արգելքի իրավաչափությունը:
«Դա ֆունդամենտալ իրավունք է եւ անհրաժեշտ է, որ դա իրացվի: Եթե դու բողոքը ճնշում ես եւ պահում ես մարդկանց մեջ, դա դառնում է եռացող կաթսա: Մեկի տան գազն են անջատել, ուզում է բողոքի, թող բողոքի: Կառավարության առջեւ ամեն օր բողոքի ակցիաներ կան: Մենք մինչեւ հիմա վարչապետի որեւէ պատասխան չունենք: Ես կարծում եմ, որ բոլոր միջոցները սպառելու դեպքում պետք է դիմել ՍԴ: Մեր դիրքորոշումը հետեւյալն է, որ ՍԴ դիմելուց առաջ ընդդիմադիր ուժերը կարող են նախաձեռնել արտակարգ դրության իրավական ռեժիմի որեւէ միջոցառում անվավեր ճանաչելու նախաձեռնություն: Նման նախաձեռնություն ԱԺ-ում չի եղել:
Հիմա կարող ենք ստորագրություններով նիստ հրավիրել եւ այդ հարցը դնել: Եթե ԲՀԿ-ն ցանկանա, մենք կարող ենք դա անել»,-ասաց Մարուքյանը:
