Ոստիկանության բարձրագույն ներկայացուցիչը ներողություն խնդրեց երեկվա միջադեպի համար՝ առանց իմ գնահատական տալու: Այս մասին, այսօր՝ հունիսի 17-ին, ԱԺ-ում լրագրողների հետ զրույցում նշեց ԱԺ փոխխոսնակ Ալեն Սիմոնյանը՝ անդրադառնալով նրան, որ երեկ ԱԱԾ շենքի մոտ ոստիկանների հետ հրմշտոցի հետեւանքով նաեւ լրագրողներ են տուժել:
«Այդ տեսանյութը կա, որ ոստիկանության ներկայացուցիչը մոտեցավ ներողություն խնդրեց, որովհետեւ այդ թոհուբոհի մեջ ոստիկանության գործողություններում միգուցե եղել են բացթողումներ: Սա աննախադեպ է եւ ես դա շատ բարձր եմ գնահատում»,-ասաց Ալեն Սիմոնյանը:
Նա խոստովանեց, որ ոստիկանության գործողությունները իրավաչափ չէին. «Եթե իրավաչափ լիներ, ներողություն չէին խնդրի»:
Ինչ վերաբերում է նրան, որ ոստիկաններից մեկը հայտարարել է, թե սա իրենց ամբողջ ներուժը չէր, ԱԺ փոխնախագահն ասաց. «Ոստիկանական զորքերում կան 20 հազարից ավելի աշխատակիցներ եւ նույնիսկ 1 կամ 10 ոստիկանի սխալի պարագայում վերածել դա քաղաքական դիսկուրսի, առնվազն ազնիվ չէ»: