EMarketer հետազոտական ընկերության վերլուծաբանները կանխատեսում են, որ 2008թ․ մեկնարկած իրենց դիտարկումների պատմության մեջ առաջին անգամ ԱՄՆ-ում գովազդից ամերիկյան Google ընկերության հասույթը տարվա արդյունքներով կնվազի, հայտնում է ՏԱՍՍ-ը՝ հղում անելով The Wall Street Journal-ին:
Ըստ eMarketer-ի՝ Google- ի հասույթը ԱՄՆ-ում գովազդից այս տարի կկազմի մոտ 39,58 մլրդ դոլար, իսկ 2019-ի վերջին այդ ցուցանիշը եղել է մոտ 41,80 մլրդ դոլար:
EMarketer-ի վերլուծաբաններն ընդգծում են, որ դիտարկումների սկզբից Google-ի հասույթը ԱՄՆ-ում գովազդից կայուն աճել է առնվազն 10%-ով: Բացառություն է եղել 2008-2009 ֆինանսական ճգնաժամի շրջանը: Այն ժամանակ աճը կազմել է մոտ 8%:
Ինչպես ենթադրում են eMarketer-ում, ընթացիկ տարվա արդյունքներով այս ցուցանիշի կրճատման հիմնական պատճառը նոր կորոնավիրուսի համավարակն է: Դրա պատճառով զբոսաշրջային ընկերությունները զգալիորեն նվազեցրել են հրապարակվող գովազդի ծավալը: Այս ընկերություններից որոշները Google-ի ամենախոշոր հաճախորդներից են:
Թերթը նշում է, որ Expedia զբոսաշրջային ընկերությունը նախկինում միլիարդավոր դոլարներ է վճարել Google-ի ծառայությունների օգնությամբ գովազդ տեղադրելու համար: Նա զգալիորեն կրճատել է այս ոլորտում ծախսերը` համավարակի պատճառով:
Ըստ eMarketer-ի գնահատականների՝ տարվա արդյունքներով Google-ի հասույթը կկրճատվի մոտ 5%-ով: Google-ի ներկայացուցիչները դեռեւս որեւէ մեկնաբանություն չեն տվել այս կանխատեսումների հրապարակման հետ կապված:
