Այս ծրագրի շրջանակներում ՄԱԿ-ը պատրաստ է 12000 դոլար աջակցություն տրամադրել մշտական խորհրդարանական հանձնաժողովներին՝ իրենց աշխատանքի որակը եւ արդյունավետությունը բարելավելու նպատակով տեխնիկական հագեցվածության համար: Այս մասին հունիսի 29-ին Հայաստանի Ազգային ժողովում մարդու իրավունքների եւ հանրային հարցերի մշտական խորհրդարանական հանձնաժողովի նիստին ՄԱԿ-ի «Նոր Հայաստան-ժամանակակից պառլամենտ» ծրագրին մասնակցության հարցի քննարկման ժամանակ հայտարարեց հանձնաժողովի նախագահ, ԲՀԿ խմբակցության պատգամավոր Նաիրա Զոհրաբյանը: Ընդ որում, նշվում է, որ յուրաքանչյուր խորհրդարանական հանձնաժողով պետք է մեկական ներկայացուցիչ ներկայացնի:
Իշխող «Իմ քայլը» դաշինքի պատգամավորից Մարիա Կարապետյանն իր հերթին առաջարկեց, որպեսզի իրենց հանձնաժողովն օգտագործի միջոցների մի մասը փաստաբան ներգրավելու համար: Նա պարզաբանեց, որ փաստաբանի ծառայություններ կարող են անհրաժեշտ լինել աշխատանքային խմբին, որը քննարկում է բռնության քարոզի դեմ պայքարը: «Նա կարող է օգնել մեզ ձեւակերպումների հարցում: Նպաստավոր ելքի եւ այս նոր օրենքի ընդունման դեպքում անհրաժեշտ կլինի փոփոխություններ մտցնել այլ օրենքներում, ինչպիսիք են «Հասարակական կազմակերպությունների գործունեության մասին» օրենքը, «Կուսակցությունների մասին» օրենքը»,- հավելեց Կարապետյանը:
Նա նաեւ հայտնեց, որ «Իմ քայլի» մեկ այլ պատգամավոր Ռուստամ Բակոյանն առաջարկել է դաշտային ուսումնասիրություններ անցկացնել Հայաստանի եզդիական համայնքներում կանանց եւ աղջիկների իրավունքների պահպանման վերաբերյալ: «Խոսքը նրանց կրթություն ստանալու իրավունքի եւ այլնի մասին է: Հատկապես մենք ուզում ենք հիմք ընդունել վաղ ամուսնությունների հարցը, պարզել, թե ինչու է դա տեղի ունենում, եւ ինչ կարելի է անել, որպեսզի դա տեղի չունենա»,- հավելեց խորհրդարանականը:
Որոշ քննարկումներից հետո պատգամավորները դրական եզրակացություն տվեցին:
