Հայաստանում գիտությունը վարկաբեկված է եւ շարունակվում է վարկաբեկվել իշխանությունների կարճատես քաղաքականության արդյունքում: Այդ մասին այսօր` մայիսի 10-ին խորհրդարանի ամբիոնից հայտարարել է ԱԺ ՀՅԴ խմբակցության պատգամավոր Լիլիթ Գալստյանը:
«Չափազանցություն չի դիտվի եթե բարձրաձայնեմ, որ Վերաբերմունքն այսպիսին է՝ շուկայական տեսք տալ գիտությանը եւ արդյունքների շուկայացման ճանապարհով ֆինանսավորման աղբյուրներ գտնել։ Բիզնես տրամաբանություն, որ գիտության պարագայում համազոր է ինքնասպանության»,- նշել է պատգամավորը։
Ըստ Գալստյանի, այն, որ Հայաստանում գիտության ու գիտնականների հանդեպ ակնածանք եւ արժեւորում չկա, արտահայտված է Ակադեմիայի համակարգում աշխատող գիտնականների վարձատրությամբ: «Ի դեպ, քիչ չեն երիտասարդ ու տաղանդավոր մարդիկ, ովքեր ստիպված են նվաստացուցիչ ցածր աշխատավարձով բավարարվել, իսկ ավելի շուտ պարտադրված են իրենց ապագան Հայաստանից դուրս փնտրել: Մեզանում վերանում են գիտությանը նվիրված լեգենդար անհատները, իսկ եթե նույնիսկ այդպիսիք կան, ապա քամահրված են ու անտեսված: Իսկ արդյունքում արժեհամակարգ ենք խեղում, հասարակությունն իր բարոյական կողմնորոշիչներում ավելի հուսահատեցնում ու մոլորեցնում»,- նկատել է Գալստյանը:
Վերջինիս կարծիքով, ցավալի է հատկապես հայագիտության վիճակը: «14 տոկոս ֆինանսավորում ստացած հայագիտական թեմաներից միայն մեկն է վերաբերում հայ գրականությանը: Անտեսված, ես կասեի` արհամարված են հայոց լեզուն եւ հայ գրականությունը: Միթե Գիտության կոմիտում կարծում են, թե հայագիտությունը միայն հայոց պատմության հարցերն են: Դարձյալ սխալված չեմ լինի եթե ասեմ, հայագիտությունը անհեռանկար եւ ծերացող ճյուղերի շարքին է դասվում»,- նշել է պատգամավորն ու ավելացրել. «Անհերքելի է, հայագետներ պատրաստելու շահագրգռություն միայն մեր հանրապետությունը պետք է ունենա: Որեմն պետք է հասկանանք, որ գիտնականի գործը գիտությամբ զբաղվելն է, իսկ պետության խնդիրը՝ առաջնահերթություններ ու գերակայություններ սահմանելն ու գիտական պատվեր իջեցնելը։ Իսկ իր գիտության մասին չհոգացող երկիրը վերածվում է գաղութի»:
