Հայ-ադրբեջանական հակամարտության տեղափոխումը երրորդ երկրների տարածքներ քննադատության արժանի է, սակայն զարմանալի չէ: Այս մասին NEWS.am-ի հետ զրույցում ասաց Ադրբեջանի հարցերով փորձագետ Գրիգորի Այվազյանը:
Նրա կանխատեսմամբ՝ սադրանքները շարունակվում են, քանի որ ադրբեջանցիները չեն պատրաստվում կանգ առնել: «Դա, իհարկե, սպոնտան չի լինի, ինչպես այն հանրահավաքները, որոնք տեղի ունեցան Տավուշի հետ սահմանին սրման հետ միաժամանակ: Այլ հարց է, որ Բաքվում հանրահավաքները դուրս են եկել Ադրբեջանի իշխանությունների հսկողությունից»,-ասաց Այվազյանը:
Նա նշեց, որ ՀՀ իշխանությունները պետք է հստակ քաղաքականություն վարեն ադրբեջանական սադրանքների դեմ: Այդ համատեքստում փորձագետը կարծում է, որ ԱԳՆ-ն անելիք ունի:
«Սահմանին գրանցված հաջողությունները պետք է ամրապնդել նաեւ դիվանագիտական մակարդակով»,-ընդգծեց փորձագետը:
Վերադառնալով Ադրբեջանի սադրանքներին՝ նա նկատեց, որ այդ երրորդ երկրների իշխանությունները չեն փորձում պատշաճ կերպով պատասխանատվության ենթարկել մեղավորներին: «Անկասկած, մեր համայնքի ներկայացուցիչները պետք է մեծ ակտիվություն ցուցաբերեն՝ դիմելով համապատասխան մարմիններին, կառույցներին, դատական ատյաններին»,-նկատեց Այվազյանը՝ հավելելով, որ հայկական համայնքների ներկայացուցիչները պետք է նաեւ ակտիվորեն աշխատեն Ռուսաստանում եւ այլ երկրներում ԶԼՄ-ների հետ:
