ԱՄՆ Պաշտպանության նախարարության երեք պաշտոնյա CNN-ին հայտնել են, որ որեւէ տեղեկություն չկա այն մասին, որ Բեյրութում տեղի ունեցած խոշոր պայթյունը հարձակում էր:
Հեռուստաալիքը նշում է, որ այս հայտարարությունը հակասում է ԱՄՆ նախագահ Դոնալդ Թրամփի պնդմանը, ով ավելի վաղ, վկայակոչելով մի շարք գեներալի, ասում էր, որ Բեյրութի նավահանգստում տեղի ունեցած պայթյունը հարձակում էր:
Մեկնաբանելով ԱՄՆ նախագահի հայտարարությունները` հեռուստաալիքի անանուն աղբյուրները նշել են, որ չգիտեն, թե ինչի մասին է խոսել ԱՄՆ նախագահը:
Նրանցից մեկը նշել է, որ եթե նշաններ լինեին, որ ինչ-որ մեկը ինչ-որ բան է արել տարածաշրջանում եւ` ոչ այդպիսի մասշտաբների, ապա դա ինքնաբերաբար կհանգեցներ ամերիկյան զորքերի եւ միջոցների պաշտպանության ուժեղացմանը տարածաշրջանում, եթե այլ պատճառներ չլինեին` վրեժխնդրության նպատալով հարձակումների մասին մտահոգությունից բացի:
Հիշեցնենք, որ ավելի վաղ ԱՄՆ նախագահ Դոնալդ Թրամփը ենթադրություն էր հայտնել, որ Բեյրութի նավահանգստում տեղի ունեցած ողբերգական պայթյունի պատճառը հարձակումն է:
ԱՄՆ նախագահի ենթադրությունն ուղիղ հակառակն է լիբանանյան իշխանությունների հայտարարությանը, որոնք հայտնել էին, որ պայթյունի պատճառը պահեստում պահվող 2.750 տոննա ամոնիումի նիտրատն է, որը վեց տարի պահվում էր նավահանգստում` առանց համապատասխան անվտանգության միջոցառումների:
Այս կապակցությամբ Միացյալ Նահանգների նախագահը վկայակոչել էր ամերիկյան զինված ուժերի ճեպազրույցները եւ շեշտել, որ միջադեպի պատճառը պայթեցված ռումբն էր:
«Ես հանդիպել եմ մեր որոշ մեծ գեներալների հետ: Եվ, կարծես, նրանք զգացել են, որ դա հարձակում էր: Դա գործարանում պայթյունի նման չէր: Նրանց կարծիքով` նրանք ավելի լավ գիտեն, կարծես, դա հարձակում էր: Ինչ-որ ռումբ»,- ասել է Թրամփը` ի պատասխան Սպիտակ տանը լրագրողի հարցին:
Հիշեցնենք, որ Բեյրութի նավահանգստի պահեստում տեղի ունեցած պայթյունի հետեւանքով, վերջին տվյալների համաձայն, ավելի քան 100 մարդ է մահացել, շուրջ 4000 մարդ վիրավորվել է:
