Գերմանիան վստահ է, որ իր սուվերեն իրավունքն է որոշել, թե որտեղից է էներգիա ստանում, եւ ոչ մի երկիր իրավունք չունի միջամտել այդ հարցին: Այս մասին Ռուսաստանի արտաքին գործերի նախարար Սերգեյ Լավրովի հետ հանդիպման ժամանակ հայտարարել է Գերմանիայի արտաքին գործերի նախարար Հայկո Մաասը՝ մեկնաբանելով «Հյուսիսային հոսք-2» գազամուղի կառուցումն ավարտին հասցնելու հարցով ծրագրերի հետ կապված իրավիճակը, հաղորդում է DW-ը:
«Ոչ մի երկիր իրավունք չունի ԵՄ-ին թելադրել իր էներգաքաղաքականությունը: Պատժամիջոցներն, անկասկած, սխալ ճանապարհ է»,-ասել է Մաասը՝ նկատի ունենալով գազամուղի կառուցման գործում ներգրավված ընկերությունների նկատմամբ ԱՄՆ սահմանափակող միջոցները:
Մաասը նշել է, որ Գերմանիան կշարունակի առաջ տանել եվրոպական ինքնիշխանության կարեւորությունը:
Իր հերթին , Լավրովը կարծիք է հայտնել, որ «Հյուսիսային հոսք-2» գազամուղի կառուցումը կհաջողվի ավարտին հասցնել:
««Հյուսիսային հոսք-2»-ի մասնակիցները, ներառյալ՝ ռուսական, գերմանական եւ այլ ընկերություններ, տրամադրված են, որ նախագիծն ավարտին հասցվի: Կան հիմքեր կարծելու, որ դա կարվի մոտ ժամանակներս»,-ասել է Լավրովը՝ անընդունելի անվանելով էքստերիտորիալ պատժամիջոցները:
Նա նաեւ բարձր է գնահատել Գերմանիայի մոտեցումը՝ այն սկզբունքային անվանելով: Լավրովը հավելել է, որ նախագիծը կարող է դիվերսիֆիկացնել բնական գազի մատակարարումների երթուղիներն ու ամրապնդել Եվրոպայի էներգետիկ անվտանգությունը:
