Բողոքի ցույցերը ճնշելու համար ՆԱՏՕ-ն որպես պատճառ օգտագործելու բելառուսական կառավարության ցանկացած փորձ «սխալ է եւ անհամաչափ»։ Այս մասին հայտարարել է դաշինքի գլխավոր քարտուղար Յենս Ստոլտենբերգը, փոխանցում է Reuters-ը։
Բեռլինում Եվրամիության երկրների պաշտպանության նախարարների հանդիպումից առաջ ելույթ ունենալով՝ Ստոլտենբերգը նաեւ կոչ է արել Բելառուսում «ազնիվ եւ արդար ընտրություններ անցկացնել» օգոստոսի 9-ի քվեարկությունից հետո, որի արդյունքները նախագահ Ալեքսանդր Լուկաշենկոյի ընդդիմախոսները կեղծված են համարում։
«ՆԱՏՕ-ն տարածաշրջանում ուժեր չի ծավալում, ուստի Բելառուսում ռեժիմի ցանկացած փորձ ՆԱՏՕ-ն որպես արդարացում կամ պատճառ օգտագործել սեփական երկրում ցուցարարներին ցրելու համար, բացարձակ սխալ է եւ բացարձակ անհամաչափ»,- լրագրողներին ասել է Ստոլտենբերգը։