Մեր քաղաքական ուժն ի սկզբանե ասում էր, որ անհրաժեշտ է աշխատել բժշկական պարագաների լուրջ պահուստ ստեղծելու շուրջ եւ դրանք ուղղել առաջին հերթին հասարակության խոցելի շերտերի պահանջմունքների բավարարմանը։ Այս մասին օգոստոսի 27-ին «Համաճարակի շրջանում պետության սոցիալական քաղաքականությունը․ այն քաղաքացիների շահերի շրջանակո՞ւմ է արդյոք» թեմայով քննարկման ժամանակ ասաց «Հանուն սոցիալական արդարության» կուսակցության նախագահ Արման Ղուկասյանը։
Նրա խոսքով՝ իշխանությունները պետք է գնային այս ճգնաժամի շուրջը հասարակության եւ տարբեր ուժերի կոնսոլիդացիայի ճանապարհով, ինչը չի արվել։ «Դրանից բացի, անհրաժեշտ էր եղած ռեսուրսները կենտրոնացնել եւ դրանք բաշխել սոցիալական արդարության սկզբունքով։ Ինչ վերաբերում է Կառավարության հակաճգնաժամային ծրագրերին, ապա դրանք քիչ արդյունավետ էին, առաջին հերթին հասցեականության տեսակետից»,- նշեց նա։
Ղուկասյանը նշեց, որ իշխանություններն ի սկզբանե սխալ գնահատեցին սպասվող հետեւանքները՝ կարծելով, թե ճգնաժամը կտեւի ընդամենը 1-2 ամիս, չնայած արտասահմանից ստացվող լուրջ ազդանշաններին։
