Գարնանը ասեկոսեներ էին տարածվել, որ Mercedes-Benz-ը պատրաստվում է հրաժարվել S-դասի կուպեից եւ կաբրիոլետից, իսկ այժմ այդ տեղեկատվությունը պաշտոնապես հաստատվել է, գրում է Մոտոր-ը։

Ինսայդերները պնդել են, որ երկդռնանի S-Class Mercedes-Benz-ի թողարկումը կավարտվի արդեն այս տարվա օգոստոսին, սակայն դա այնքան էլ այդպես չէր։ Չնայած այժմ Mercedes-Benz-ը հաստատել է S-Class կուպեից եւ կաբրիոլետից հրաժարվելու փաստը՝ պարզվել է, որ դրանք կարտադրվեն եւս մեկ տարի, սակայն 2021 թվականն, այնուամենայնիվ, վերջինը կդառնա դրանց համար։ Թեպետ միակ թարմացումն այդ մոդելների համար 2021 թվականին կլինի Cirrus Silver նոր գույնը։

Որպես S-դասի կուպեի եւ կաբրիոլետի թողարկման դադարեցման պատճառ՝ աղբյուրները նշել են միջոցների տնտեսումը նոր էլեկտրամոբիլների ստեղծմանն ու արտադրմանը նախապատրաստվելու շրջանակում։ Կրճատված մոդելների փոխարեն Mercedes-Benz-ը հաճախորդներին կառաջարկի AMG GT կուպե եւ նոր SL ռոդսթեր։ S-Class կուպեն եւ կաբրիոլետը կառուցված է W222 սերնդի սեդանի հիման վրա, որը թողարկվում է արդեն շուրջ յոթ տարի։