Հնդկաստանի եւ Չինաստանի սահմանին իրավիճակը կրկին սրվել է: Հնդկաստանի ՊՆ-ն հայտնել է օգոստոսի 29-ի լույս 30-ի գիշերը սահմանին չինացի զինվորականների հետ բախումների մասին, հաղորդում է RG-ը:
Նյու Դելիում չինացի զինվորականների գործողությունները «սադրիչ» են անվանել: Նշվում է, որ հնդիկ զինվորականներն ամրապնդել են իրենց դիրքերը եւ չեն թողել փոխել իրավիճակը:
Հիշեցնենք, որ Հնդկաստանի եւ Չինաստանի միջեւ սահմանին Լադակխի շրջանում իրավիճակը սրվել է մայիսին: Այդ ժամանակ յուրաքանչյուր կողմից բախումներին մասնակցել է մի քանի հարյուր զինվորական, հաղորդվել է զոհերի եւ վիրավորների մասին: Դրանից հետո բանակցություններ են սկսվել ռազմական եւ դիվանագիտական մակարդակներով, սակայն որեւէ արդյունք չի գրանցվել:
Հարկ է նշել, որ սահմանների ճանաչման խնդիրն առկա է արդեն երկար տարիներ: Այն կարգավորելու ոչ մի փորձ հաջողությամբ չի պսակվել:
