Ամերիկայի Միացյալ Նահանգները պատժամիջոցներ է սահմանել Ռուսաստանի ութ քաղաքացիների եւ այնտեղից ներգաղթյալների, ինչպես նաեւ յոթ ռուսական եւ ֆիննական կազմակերպությունների դեմ, ասվում է ԱՄՆ ֆինանսների նախարարության կայքում, փոխանցում է «ՌԻԱ Նովոստի»-ն:
Ինչպես նշվում է, այս որոշումն ընդունվել է՝ կապված կիբեռհանցագործությունների, ԱՄՆ-ում ընտրություններին միջամտելու եւ Ուկրաինայում տիրող իրավիճակի հետ:
Պատժամիջոցների ցուցակում ընդգրկվածների թվում են ռուսաստանցիներ Բորիս Գայկովիչը, Ելենա Իվանովան, Նադեժդա Կուչումովան եւ Վլադիսլավ Զանինը (բոլորը Սանկտ Պետերբուրգից են)։ Ալեքսանդր Կուզինը, Դմիտրի Սիտիյը եւ Եվգենի Խոդոտովը ապրում են Կենտրոնական Աֆրիկայի Հանրապետությունում, իսկ Նիկիտա Կովալեւսկին՝ Ֆինլանդիայում (նա ունի ֆիննական քաղաքացիություն):
Ցուցակում են նաեւ Ֆինլանդիայում գտնվող Acex OY, GCH Finland OY, Optima Freight OY եւ Unicum Trade OY ընկերությունները: Ըստ ԱՄՆ ֆինանսների նախարարության, նրանք բոլորը գտնվում են նույն հասցեում: Բացի այդ, պատժամիջոցներ են կիրառվել նաեւ ԿԱՀ-ում գտնվող Lobaye Invest-ի, Սանկտ Պետերբուրգում գտնվող «Մ-Ֆինանս» ԲԲԸ-ի եւ «Օկեանոս» ընկերության հանդեպ:
