Թաիլանդում ամերիկացուն դատի են տվել Tripadvisor-ում բացասական արձագանքի համար: Նրան կարող է սպառնալ երկու տարվա ազատազրկում, եթե մեղավոր ճանաչվի:
Ներքին զբոսաշրջությունը նախկինի պես վերելք է ապրում Թաիլանդում, որտեղ կորոնավիրուսով վարակվածների թիվը համեմատաբար ցածր է, իսկ տեղացիներն ու ներգաղթած աշխատողները գնում են գրեթե դատարկ հանգստավայրեր, այդ թվում՝ Կո Չանգ կղզի, որը հայտնի է իր ավազոտ լողափերով եւ փիրուզագույն ջրերով:
Սակայն վերջերս կղզում Sea View Resort հանգստավայր այցելությունը տհաճություններ է բերել Ուեսլի Բարնսին այն բանից հետո, երբ նա իր արձակուրդի մասին բացասական արձագանքներ է թողել համացանցում:
«Sea View Resort-ի սեփականատերը բողոք է ներկայացրել այն մասին, որ ամբաստանյալը հյուրանոցի մասին անարդար որակումներ է տեղադրել Tripadvisor-ում»,- AFP-ին ասել է Կո Չանգի ոստիկանության ուժերի գնդապետ Տանապոն Տեմսարան:
Բարնսին մեղադրել են «հյուրանոցի վարկանիշը վնասելու» եւ անձնակազմի հետ վիճաբանելու մեջ:
Բարնսը, ով աշխատում է Թաիլանդում, ձերբակալվել է ներգաղթի ոստիկանության կողմից եւ վերադարձել է Կո Չանգ, որտեղ նրան կարճ ժամանակով կալանավորել են, ապա գրավի դիմաց ազատ են արձակել:
Tripadvisor-ում կատարած գրառման համաձայն, Բարսն առնչվել է «անբարյացկամ աշխատողների հետ», ովքեր «այնպես են իրենց պահում, կարծես ոչ ոքի չեն ցանկանում այստեղ տեսնել»: