Ռազմական դրություն է հայտարարվում այն ժամանակ, երբ գոյություն ունի հարձակման իրական սպառնալիք։ Բայց եթե հիմա ասեմ, թե ինչ ուղղությունների մասին կարող է խոսք լինել, դա կնշանակի, որ բացահայտում եմ մեր ունեցած տեղեկությունները, եւ դրանով այն կարժեզրկեմ։ Այս մասին սեպտեմբերի 27-իՆ ԱԺ արտահերթ նիստում երկրում ռազմական դրություն հայտարարելու եւ համընդհանուր զորահավաք անցկացնելու մասին հարցի քննարկման ժամանակ ասաց վարչապետ Նիկոլ Փաշինյանը՝ պատասխանելով «Լուսավոր Հայաստան» կուսակցության պատգամավոր Անի Սամսոնյանի հարցին։
Պատգամավորը, մասնավորապես, հետաքրքրվել էր՝ արդյոք տեղեկություններ կա՞ն, որ հակառակորդը հարձակումներ է նախատեսում նաեւ այլ ուղղություններով։
«Թույլ տվեք այդ հարցին չպատասխանել, քանի որ իրավիճակն անչափ լարված է եւ անկանխատեսելի»,- պատասխանեց Փաշինյանը։
Հիշեցնենք, որ կիրակի՝ սեպտեմբերի 27-ին, Ադրբեջանի Զինուժը, կոպտորեն խախտելով միջազգային հումանիտար իրավունքի գործող նորմերն ու հակամարտության լուծման խաղաղ բանակցային գործընթացի տրամաբանությունը, կիրառելով հրթիռահրետանային միջոցներ եւ ավիացիա, հարձակվել է շփման գծի ամբողջ երկայնքի ուղղությամբ՝ թիրախավորելով Պաշտպանության բանակի մարտական դիրքերն ու Ղարաբաղի խաղաղ բնակավայրերը:
